DILI, 24 Janeiru 2026 (TATOLI) – Institutu Nasionál Estatístika Timor-Leste, Institutu Públiku (INETL, I.P) rejista deflasaun 0,1% iha Índise Presu Konsumidór (IPK) fulan-Dezembru 2025, kompara ba fulan-Novembru iha inflasaun 0,1%.
Tuir dokumentu INETL, presu tun 0,1% tanba hetan kontribuisaun husi grupu hahán no bebida la’ós alkoólika tun 0,1%, hatais no sapatu 0,2% no alkoól no tabaku 0,2%.
Enkuantu grupu transporte sa’e 0,2% no ekipamentu no manutensaun mobiliáriu uma -laran sa’e 0,4%, ne’ebé sai hanesan mudansa kontráriu ba inflasaun grupu hotu mensál.
“Grupu hahán no bebida la’ós alkoólika tun 0,1% tanba hetan impaktu maioria husi subgrupu foos tun 0,7%, masin-midar, marmelada, banibeen, xokolate no hahán midar tun 0,4%, susubeen, keiju no manutolun -1,4%, ai-fuan -0,8% no modo-tahan -0,3%”, haktuir dokumentu INETL.
Basub grupu ikan no hahán tasi sa’e 1,3%, naan (0,1%), bee, bebida, jus ai-fuan no modo-tahan (2,4%), no paun no sereál (0,4%), sai hanesan mudansa kontráriu ba inflasaun grupu hahán no bebidas la’ós alkoólika ba Dezembru 2025.
Mudansa persentajen IPK anuál sa’e 1,0% kompara entre fulan-Dezembru tinan-2025 no fulan-Dezembru tinan-2024, hetan kontribuisaun husi grupu hahán no bebida la’ós alkólika sa’e 2,0%, edukasaun sa’e 0,4%, ekipamentu no manutensaun mobiláriu uma-laran 1,3%, uma 1,1% no rekreasaun no kultura 0,5% ba anuál Dezembru 2025.
Grupu transporte tun 0,1%, alkoól no tabaku tun 2,9%, komunikasaun 0,2% no hatais no sapatu 0,3%, sai hanesan mudansa kontráriu ba inflasaun grupu hotu ba anuál Dezembru 2025.
Kona-ba inflasaun tradeable tun 0,1% no non-tradeable tun mós 0,2% iha mensál, kompara entre fulan-Dezembru tinan-2025 no Novembru 2025. Inflasaun tradeable sa’e 1,0% no non-tradeable sa’e mós 1,1% iha anuál, kompara entre fulan-Dezembru tinan-2025 no Dezembru 2024.
Notísia relevante: INETL divulga inflasaun 0,1% iha Novembru
TATOLI
