DILI, 26 Janeiru 2026 (TATOLI)–Ekipa Blue Ventures Timor-Leste, segunda ne’e, hasoru malu ho Prezidente Repúblika José Ramos-Horta hodi relata progresu serbisu ne’ebé durante ne’e halo iha Timor-Leste hodi konserva ambiente tasi.
Notísia Relevante: Blue Ventures – Kiwa promove ekosistema mariña iha área kosteira
“Ami mai ne’e atu aprezenta ami-nia serbisu ne’ebé foka liu ba konservasaun ambiente iha tasi liuliu peska nian. Ami durante ne’e serbisu hamutuk ho komunidade iha área kosteiru hanesan Hera, Atauru, Manatutu, Betano no ami sei avansa tan ba Suai Loro,” Diretora Ezekutiva Blue Bentures, Bernadete da Fonseca, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia hateten, Blue Ventures Timor-Leste nia baze iha Inglaterra no eziste iha Timor-Leste kompleta ona tinan 10.
“Ami-nia baze iha Inglaterra, Blue Ventures eziste iha Timor-Leste tinan 10 ona, entaun tinan ne’e ami selebra ami nia aniversariu ba dala-10, ida-ne’e mak ami mai aprezenta ami-nia serbisu sira ba Prezidente. Ami-nia serbisu foka liu oinsa suporta komunidade oinsa iha koñesementu ba rekursu tasi nian,” Diretora ne’e hateten.
Rekursu tasi ne’ebé durante ne’e Blue Venture hamutuk ho komunidade sira konserva mak hanesan ahu-ruin tasi nian, duut ne’ebé moris iha tasi, ai-parap,a oinsa fó ambiente ne’ebé di’ak ba tasi.
“Ami la’ós serbisu ho komunidade de’it maibé ami mós serbisu ho Governu liuliu Ministériu Agrikultura, Peska, Pekuaria no Floresta (MAPPF), ami mós serbisu hamutuk ho parte ekonomia azúl oinsá ita konserva no halo protesaun ba rikusoin sira iha tasi-laran. Ita hatene agora ita-nia Governu plania hela atu tarsnforma Ataúru sai parke nasionál, entaun ami-nia objetivu mak apioia Governu ba konserva rekursu tasi nian,” nia dehan.
Bainhira simu tiha ekipa Blue Ventures rona kona-ba serbisu ne’ebé grupu ne’e halo, Xefe Estadu rekomenda ba Blue Ventures atu kontinua serbisu nafatin ba oin ho evidénsia no fó benefisiu ba komunidade.
“Prezidente simu no rona ami-nia aprezentasaun hotu. Rekomendasaun ne’ebé Prezidente hato’o mai ami mak kontinua serbisu ho di’ak, tenke ho evidénsia labele gasta osan arbiru de’it, maibé tenke halo serbisu ne’ebé fó impaktu pozitivu ba komunidade,” nia hateten.
Notísia Relevante: Blue Ventures ho Komunidade Suku Uma-Caduak Tara Bandu iha área Kosteira
Jornalista : Hortencio Sanchez
Editór : Cancio Ximenes
