OEKUSI, 26 Janeiru 2026 (TATOLI) – Progresu fíziku ba konstrusaun postu saúde Kutete, lokaliza iha suku Kutete sub-rejiaun Pante Makasar Rejiaun Administrativa Espesiál Oekusi Ambeno (RAEOA) nia serbisu fíziku atinje ona 28%.
Tékniku empreza, Armindo Quefi, relata progresu ne’e, hetan vizita ofisiál husi Diretora Diresaun Rejionál Saúde, Merita Marques Lafo, iha suku Kutete, foin lalais ne’e.
“Agora hada batako, semana oin ami bele remata depois sa’e ona atu tama sinta, depois kontinua ba odamatan sira maibé tanba udan, entaun dalaruma ami deskansa, ne’ebé agora ami bele dehan 28% ona ba serbisu fíziku nian,” nia hateten iha Kutete, foin lalais ne’e.
Notísia relevante:Autoridade RAEOA aloka verba rihun $85-resin konstrui postu saúde iha suku Kutete
Iha biban ne’e, Diretora Diresaun Rejionál Saúde, Merita Marques Lafo, rekomenda, presiza aselera, nune’e komunidade sira bele asesu ona iha fulan-Abríl tinan ne’e.
“Mezmu udan maibé presiza halais, tanba bainhira ita harii fasilidade saúde iha ne’e, ema hotu hakarak mai halo tratamentu, tanba durante ne’e sira tenke la’o do’ok, tanba ne’e ha’u espera to’o fulan-Marsu ka Abríl bele finaliza ona, nune’e ita-nia inan-aman sira bele asesu ona,” nia apela.
Xefe suku Kutete, José António Bana, agradese tanba suku foun, ne’ebé presiza tebes apoia fasilidade públiku husi Governu atu fasilita komunidade sira bele asesu ho distánsia besik.
“Agradese tanba uluk ekipa saúde hamutuk ho obra públika identifika ona fatin, ne’ebé komunidade sira voluntariamente oferese rai, tanba Kutete dezde uluk to’o agora seidauk iha fasilidade saúde, maibé horsehik ami haree autoridade aprova ona, entaun tempu badak kompañia bele hahú serbisu ona. Ne’ebé, ami agradese tanba ami suku foun, presiza tebes fasilidade públika husi Governu,” nia orgullu.
Notísia relevante:Iha Janeiru: Postu saúde Sakato rejista kazu tolu, maioria afeta ba labarik
Konstrusaun postu saúde Kutete ne’e, ezekuta husi emoreza Rainha Mena Unipesoál Lda. ho valór rihun $85,957.58, Autoridade RAEOA aloka husi Orsamentu Jerál Estadu (OJE) 2025 nian.
Jornalista: Abílio Elo Nini
Editór: Rafael Ximenes de A. Belo
