OEKUSI, 26 Janeiru 2026 (TATOLI) – Iha fulan-Janeiru 2026 ne’e, profisionál saúde sira iha postu saúde Sakato, suku Nípani sub-rejiaun Pante Makasar Rejiaun Administrativa Espesiál Oekusi Ambeno (RAEOA) rejista kazu moras tolu hanesan ISPA (Infesaun Via Respiratóriu Aguda), osteutritis (osteoarthritis – Moras dejenerativa ida iha artikulasaun sira ne’ebé kauza estragu ba kartilajen no mudansa sira iha forma ruin nian) no eda ka kabun moras nian.
“Moras ne’ebé aas iha postu saúde Sakato mak ISPA 35, osteutritis 15 ka ruin moras no eda nian ka labarik sira-ne’ebé kabun moras hamutuk 10, ne’ebé husi kazu tolu ne’e, afeta maioria ba labarik tinan-lima mai kraik,” infermeira Delfiana Neno dehan, ba jornalista sira iha postu saúde Sakato, ohin.
Pesoál saúde ne’e esplika, kauza husi moras ISPA ne’e mai husi konsiénsia inan-aman, tanba kuandu loron manas labarik halimar rai-rahun no tempu udan dalaruma haris bee-udan no rai-tahu, depois agora tempu udan aumenta tan ho lalár barak dalaruma ladun tau atensaun ba sira-nia hahán no la fase liman bainhira tempu han.
“Entaun buat sira-ne’e, fasil halo labarik sira kabun moras, kona-ba osteutritis ne’e labarik ladun barak afeta barakliu mak adultu, ne’ebé iha ne’e kada loron ita simu pasiente kuaze ema na’in-30 no ba ai-moruk sufisiente hela, laiha problema,” nia afirma.
Notísia relevante:PM Xanana vizita pasiente no observa fasilidade inklui ai-moruk iha Ospitál Oekusi
Delfiana Meco nu’udar pasiente hafoin konsulta iha postu saúde Sakato, hateten, durante ne’e sempre hakbesik beibeik ba fasilidade, atu tetu labarik, nune’e bele hatene nia todan.
“Ha’u ohin mai konsulta ha’u-nia oan tanba isin manas, ne’ebé ha’u rasik observa atende di’ak depois fó ita ai-moruk, tanba ha’u mai konsulta beibeik, kuandu ha’u-nia oan la moras mai tetu de’it, atu hatene nia todan, tanba durante ne’e ami rona, Oekusi mós rejista kazu má-nutrisaun entaun presiza kada fulan mai tetu labarik sira atu hatene iha mudansa ka la’e ba nia todan,” nia hateten.
Notísia relevante:Komisaun F deteta problema tolu iha Ospitál Referál Oekusi
Entretantu, totál profisionál saúde ne’ebé hala’o serbisu iha postu saúde Sakato hamutuk na’in-haat komposta husi médiku jerál ida, parteira rua no enfermeira ida.
Jornalista: Abílio Elo Nini
Editór: Rafael Ximenes de A. Belo
