DILI, 27 Janeiru 2026 (TATOLI)-Parlamentu Nasionál (PN) realiza, iha loron 28 Janeiru, sesaun solene hodi simu vizita Primeiru-Ministru Austrália, Anthony Albanese.
Tuir ajenda, atividade ne’e sei hahú iha tuku 15h00, ne’ebé hahú ho enkontru entre Prezidente Parlamentu Nasionál, Maria Fernanda Lay, no Xefe Governu autralianu iha minutu balun, hafoin dirije bá plenária.
Tuir giaun, hahú ho hananu inu nasionál país rua nian, Prezidente Parlamentu deklara abertura sesaun solene no intervensaun husi reprezentante bankada parlamentár husi Partidu Kongresu Nasionál Rekonstrusaun Timorense (CNRT sigla, portugés), Partidu Demokrátiku (PD), Frente Revolusionária Timor-Leste Independente (FRETILIN), Kmanek Haburas Unidade Timoroan (KHUNTO) no Partidu Libertasaun Populár (PLP) durante minutu lima.
Hafoin intervensaun Prezidente Parlamentu no Primeiru-Ministru Austrália enserra sesaun ne’e.
Sekretária Meza PN, Virgínia Ana Belo, dehan sesaun solene ne’e halo hanesan baibain bainhira iha vizita ruma husi alta entidade nasaun seluk. “Primeiru-Ministru Austrália vizita Timór primeira vez, ita simu hanesan bainaka alta entidadea ida, espera sei lori buat ruma ba ita”, dehan.
Tuir observasaun jornalista Tatoli, funsionáriu sira iha Parlamentu hahú halo preparasaun fatin iha sala plenária laran ba eventu aban nian.
Tuir oráriu, ne’ebé iha loron 28 fulan-Janeiru, Anthony Albanese sei to’o iha Timor-Leste ho aviaun privadu pur volta tuku 09h00, ne’ebé sei simu direta husi Prezidente Repúblika, José Ramos-Horta, no Primeiru-Ministru, Xanana Gusmão. Sai husi Aeroportu Internasionál Prezidente Nicolau Lobato Dili, kontinua kedas bá Palásiu Prezidensiál Nicolau Lobato.
Durante iha Palásiu Prezidensiál, Anthony Albanese sei hala’o enkontru ho Prezidente Ramos-Horta, bainhira termina enkontru Primeiru-Ministru ne’e bá deskansa iha Otél Palm Spring, Fatuhada.
Hafoin deskansa durante minutu 15, Anthony Albanese kontinua vizita bá Palásiu Governu hodi hala’o enkontru bilaterál ho Xefe Governu Xanana Gusmão. Hafoin ramata líder australianu ne’e hakat liu bá Parlamentu Nasionál.
Iha loraik, Anthony Albanese ne’ebé akompaña husi Xefe Estadu no Xefe Governu ba Palásiu Nobre Lahane hodi jantár hamutuk no iha 29 Janeiru dadeer, pur volta tuku 07h00, fila hikas bá Austrália.
Notísia relevante: Primeiru Ministru Austrália agradese ba konvite husi Xanana Gusmão no Ramos-Horta
Jornalista: Nelson de Sousa
Editora: Maria Auxiliadora
