KOVALIMA, 28 Janeiru 2026 ( TATOLI) – Ministériu Administrasaun Estatal (MAE) aprezenta rezultadu relatóriu prelimináriu avaliasaun kondisaun minimu hodi rekomenda pontu prinsipál neen ba autoridade Munisípiu Kovalima hodi implementa dezentralizasaun Administrativa no podér lokál.
Pontu Prinsipál neen husi MAE mak dadus monográfia no demografia, Jestaun finanseira, aproveitamentu kontratasaun públika, instalasaun rekursu umanu, rekursu minerál no sistema administrasaun.
Iha Pontu prinsipál neen ne’e importante liu mak kumpre orden no disiplina rigór hodi evita abuzu no tane aas étika profesionál.
Dadus monografia no demografia kada suku, postu no munisipiu importante loos atu update iha sistema iha kada fulan.
Kona-bá jestaun finanseira no aprovizionamentu, kada munisipiu prezisa kria sistema kontrolu finanseiru (livru kaixa) bazeia ba rekomendasaun Kamara Kontas hodi publika materia hirak ne’e iha portal munisipal no prezisa reforsa no la’o tuir SOP/TOR, relatóriu ezekusaun tenke kumpre prosedimentu legál ho vigór no presiza kumpre kalendáriu b aimplementasaun programa PDIM.
Konstrasaun públika mak tenke iha mapamentu, planu orsamentu no kabementu orsamentu no tenke iha uluk planu aprovizionamentu ne’ebé hetan aprovasaun husi Ministru hahú husi inisiu anu fiskál.
Kona-ba instalasaun no rekursu minerál ne’e presiza propoin iha planu orsamentu 2027 no presiza melloramentu ba rekursu minerál no kondisaun ne’ebé la kompleta.
Enkuantu ba sistema administrasaun presiza reorganiza servisu administrativu hotu tuir baze legál ne’ebé iha no presiza melloramentu jestaun arkivu no Prezidente Autoridade Munisípiu Kovalima no Diretór servisu Munisipál presiza komprende irárkia servisu nian.
“Ami nia prezensa fó de’it asisténsia ajuda oinsa mak bele la’o bainhira la fó importansia buat hotu sei fila ba ita boot sira tanba desizaun iha ita boot sira nia liman”, Diretora Jerál Tonimia Organizasaun Urbana, Maria Odete Barros Florindo hoto’o liuhusi nia diskursu , iha salaun AMC, ohin.
Iha fatin hanesan, Prezidente Autoridade Munisípiu Kovalima, Miguel Armanda Cardoso, reforsa katak Ministériu Administrasaun Estatál aprezenta rezulta prelimináriu avaliasaun kondisaun minumu ba autoridade munisípiu Kovalima.
“ Atividade ohin ne’e husi MAE mai halo aprezenta rezultadu avaliasaun kondisaun minima hala’o iha fulan rua liu ba ohin aprezenta ne’ebé maka iha buat balun ami la’o di’ak no balun seidauk, nune’e nia rezultadu “Bom” signifika atu haree fali ho sériu, nune’e bele rekoñese ami nia frakeza atu futuru bele iha mudansa,” PAM afirma.
Ho rekomendasaun ne’ebé mak sita hanesan Autoridade Kovalima iha responsabilidade servisu ho unidu hanesan problema internál munisípiu, maibé ezekuta servisu la’o ho di’ak hodi kumpre regra no mós identifika kestaun téknika.
Notisia relevante:Deputada PD husu munisípiu oan sira serbisu hamutuk hodi simu podér lokál
Jornalista: Celestina Teles
Editór: Florencio Miranda Ximenes
