OEKUSI, 30 Janeiru 2026 (TATOLI) – Durante 2025, hahú husu fulan Janeiru mai to’o Dezembru, Diresaun Rejionál Rejistu Sívil Notariadu Rejiaun Administrativa Espesiál Oekusi Ambeno (RAEOA) kontribui reseita ba kofre Estadu hamutuk rihun $144,250.000 mai husi tratamentu kadernu pasaporte ba ema 2.585.
“Iha tinan kotuk ita produs kadernu pasaporte ba 2.585 ho taxa mak rihun $144,250.000, tanba orientasaun husi Diresaun Nasionál fó limitasaun, semana ida dala ida fó ema na’in-15 ou 20 de’it,” Diretór Diresaun Rejionál Terra Propriedade no Rejistu Sívil Notariadu Oekusi, José Ase Neno Colo hato’o, iha Oekusi, ohin.
Notísia relevante:Fornesimentu materiál ba notariadu Oekusi sei gasta rihun $206-resin
Autoridade ne’e esplika, tipu ba tratamentu pasaporte depende ba sidadaun hotu nia barak, tanba tuir lei, hateten katak, atu trata pasaporte aplika taxa oin tolu, bele selu dolar $30 durasaun tempu loron 10 mak foin bele foti, selu dolar $75 durasaun loron tolu de’it bele foti ona no selu dolar $100 foti kedas iha oras 24 nia laran.
“Maibé dezafiu durante ne’e ami enfrenta mak komputadór, liña internet no simu mós preokupasaun husi komunidade tanba laiha serteza atu foti kedan pasaporte iha Oekusi, tanba kona-ba planu atu foti tenke iha Díli hodi hetan asinatura husi Diretór Notariado Nasionál,” nia hateten.
Ezekutivu ne’e hateten, tratamentu pasaporte iha 2025 maioria komun, ho nia kritéria presiza dokumentu rua de’it, mak sertidaun RDTL no kartaun Billete Identidade.
Notísia relevante:Autoridade sei koordena Ministériu Justisa aumenta kuota pasaporte ba notariadu Oekusi
Jornalista: Abílio Elo Nini
Editór: Rafael Ximenes de A. Belo
