OEKUSI, 30 Janeiru 2026 (TATOLI) – Hahú husi fulan Janeiru mai to’o Dezembru 2025, Diresaun Rejionál Terra no Propriedade Rejiaun Administrativa Espesiál Oekusi Ambeno (RAEOA), arrekada reseita hamutuk millaun $4,055.451 husi arrendamentu rai no uma Estadu.
Notísia relevante:Terra Propriedade sei regulariza didi’ak arrendamentu rai Estadu iha Oe-Cusse
Diretór Diresaun Rejionál Terra Propriedade no Rejistu Sívil Notariádu Oekusi, José Ase Neno Colo, informa, reseita ne’e mai husi fonte rua, Terra Propriedade rihun $55,451.00, husi Prezidente Autoridade RAEOA millaun $4.000.000 empreza internasionál Core Manajement Corporation Unipesoál Lda mak arrenda Otél Oe-Upun.
“Taxa sira-ne’e mai husi arrendamentu rua, ida husi Diresaun Terra Propriedade mak kontratu direita ho arrendatáriu sira hamutuk ema na’in-200, ba investimentu boot sira, Prezidente Autoridade mak asina kontratu direita no sira rasik mak hasai resivu, hanesan arrendamentu Otél Oe-Upun,” nia relata ba jornalista sira iha Oekusi, ohin.
Dirijente ne’e esplika katak tuir kontratu arendamentu, bainhira arrendatáriu ida selebra ona kontratu ho Estadu no la kumpre kontratu referidu ka tarde halo pagamentu, autoridade bele fó sansaun ka hapara kontratu no bele fó 50% husi valór kontratu mensál nian.
Maibé durante ne’e mós arrendatáriu balun, la kumpre sira-nia obrigasaun hodi selu taxa maske selebra ona kontratu arrendamentu rai no uma Estadu, tanba tuir lista, arrendatáriu iha Oekusi kuaze 300, maibé sira-ne’ebé kontribui reseita na’in-200 ne’e de’it.
“Entaun iha tinan ne’e, ita sei atribui notifikasaun ba sira-ne’ebé dezobidiénsia, tenke kumpre kontratu, kuandu la kumpre parte terra propriedade sei prosesu tuir lei, tanba iha dokumentu kontratu ne’e mós sita ona nia sasaun katak, sira-ne’ebé la selu, tenke multa ba Estadu, depois mak aplika fali presu normál tuir kontra ou bele hamamuk fatin,” nia promete.
Tanba polítika Autoridade hakarak regulariza rai no Estadu hotu iha Oekusi, sira-ne’ebé mak durante ne’e laiha kontratu Autoridade RAEOA liuhusi serbisu terra propriedade sei notifika sira, atu kooopera hodi atribui títulu arrendátariu.
“Tipu arrendátariu sira-ne’e, depende idak-idak nian, balun uza rai Estadu halo negosíu, balun hela no balun uza ba investimentu seluk, ne’ebé tipu arrendemantu atu aplika taxa ita sei haree husi rai nia luan no uma nia kondisaun,” nia afirma.
Notísia relevante:Empreza Nuntimo fornese ona mobiliáriu ba atendimentu iha terra no propriedade ho notariadu Oekusi
Fernando Nono, nu’udar arrendatáriu, husi sub-rejiaun Nítibe, orgullu tanba fatin ne’ebé nia hela ba ho dignu no justu, nune’e iha obrigasaun atu kontrirui reseita ba Estadu.
“Ha’u hela iha uma Estadu, kada fulan ha’u sempre selu dolár $10, tanba ha’u mai husi área rurál, fatin ne’ebé ha’u hela, sente justu uitoan, tan ne’e mak ha’u tenke kontribui ba Estadu nune’e bele hela ho hakmatek la’ós hela ho gratuita,” nia dehan.
Notísia relevante:SETP enkontru komunitária ho abitante suku haat iha Oekusi prepara atribui títulu rai
Entretantu, selebrasaun kontratu arrendamentu sira-neʼebé aplika ba uma no rai Estadu, bazeia ba lei númeru 01/2003, loron 10 fulan-Maiu, no nia implementasaun utiliza dekretu-lei númeru 19/2004, loron 29 fulan-Dezembru.
Jornalista: Abílio Elo Nini
Editór: Rafael Ximenes de A. Belo
