DILI, 30 Janeiru 2026 (TATOLI)—Primeiru-Ministru, Kay Rala Xanana Gusmão, no Embaixadór Alemaña iha Timor-Leste, Ralf Beste, sesta ne’e, hala’o enkontru hodi diskute kona-ba kooperasaun bilaterál entre nasaun Timor-Leste no Alemaña ba loron aban.
Embaixadór Alemaña ba Timor-Leste, Ralf Beste, hateten ohin nia hasoru Primeiru-Ministru hodi ko’alia kona-ba kooperasaun no diskusaun ne’ebé naruk ba pozisaun Alemaña ne’ebé apoia tebes Timor-Leste nia independénsia.
“Antes ha’u atu mai hasoru Primeiru-Ministru, ha’u mós hasoru malu ona ho Prezidente Repúblika hodi entrega ona ha’u-nia akreditasaun ba Prezidente Repúblika,” Embaixadór Alemaña ne’e informa ba jornalista sira iha Palásiu Governu, ohin.
Nia dehan, Primeiru Ministru hato’o agradesementu ba Alemaña nia apoiu ne’ebé fó ona ba Timor-Leste dezde independénsia iha tinan 2000, entaun ida-ne’e bele hari’i kooperasaun ne’ebé forte liután.
Tanba, nia dehan, Timor-Leste hanesan membru foun iha ASEAN nian, iha pozisaun ne’ebé di’ak liu agora presiza mós atu organiza nia kooperasaun ho Alemaña no União Europeia, hanesan membru foun iha ASEAN ba demokrasia forte ida.
“Ami fiar katak sei fortalese determinasaun ASEAN nian atu sai parseiru ne’ebé forte liu ba União Europeia. Tanba ne’e mak ha’u iha ne’e atu tulun kooperasaun forte entre ami-nia nasaun rua, Alemaña no Timor-Leste. Buat hotu-hotu, ha’u bele halo atu promove amizade entre ami-nia povu no Governu,” nia dehan.
Aleinde ne’e, nia hateten, durante ne’e sira mós kontribui barak ona ba Timor-Leste hanesan oferese ró (ferry boat) rua ne’ebé Governu Alemaña finansia no uza ona, sira mós kontribui barak ba treinamentu vokasionál ba joven Timor-Leste sira-ne’ebé bele kualifikadu di’ak-liu iha servisu, tanba sira iha programa troka liuhusi sira-nia sistema edukasaun nian hanesan lori akadémiku husi Timor-Leste atu ba estudu komparativu iha Alemaña.
“Nune’e, iha ha’u-nia enkontru tuir mai atu ko’alia ho alumni Universidade Alemaña nian husi Timor-Leste ne’ebé hanesan ai-hun konstrutór entre nasaun rua iha área dezenvolvimentu, desportu no mós edukasaun. Ami troka esperiénsia no ami informa malu kona-ba trajetória ami-nia nasaun nian,” nia informa.
Aleinde ne’e, nia hatutan, iha enkontru ohin ne’e nia mós hetan breafing kona-ba situasaun ne’ebé Timor-Leste halo diskusaun ho Governu Austrália nian, ne’ebé importante tebes prezensa Primeiru-Ministru Austrália nian iha ne’e.
“Ha’u mós ko’alia kona-ba ami-nia planu atu servisu besik liu iha ASEAN, katak la’ós de’it ba nasaun rua atu koñese malu maibé mós atu informa malu kona-ba dezenvolvimentu iha ida-idak nia nasaun,” nia dehan.
Jornalista : Alexandra da Costa
Editór : Cancio Ximenes
