KOVALIMA, 03 Fevereiru 2026 (TATOLI) – Autoridade postu no suku inklui Komunidade husi Aldeia Aulilin Suku Laktos, husi Postu Administrativu Fohorem, Munisípiu Kovalima, preokupa ba kondisaun estrada aat hodi defikulta movimentu ema no sasan husi suku bá postu administrativu.
“Ami durante ne’e kontinua halerik tanba seidauk asesu estrada oinsá atu fasilita ami hodi lori ami nia produtu lokál, nune’e bele ba faan iha merkadu hodi hetan osan atu sustenta ami nia família,” Abitante husi Fohorem, Damingos Seran, informa ba jornalista TATOLI,I.P iha Fohorem, ohin.
Ho kondisaun estrada ne’ebé aat ne’e, komunidade ne’e husu ba Governu liuliu Ministeriu Obra Publiku atu halo levatamentu, nune’e bele fasilita komunidade nia movimentu.
Iha fatin hanesan, Abitante Fohorem, Anastacio Amaral,reforsa katak kondisaun estrada aat duni, nune’e iha tempu udan tahu nakonu hodi difikulta komunidade atu halo movimentu uza transporte públiku no privadu.
“Ami preokupa tebes kondisaun estrada tanba estrada aat tebes,” nia informa.
Tanba ne’e, nia husu Governu atu hadi’a estrada ne’e tanba importante ba komunidade sira atu fasilita komunidade lori produtu lokál ba faan iha merkadu hodi hetan osan ba nesesidade no selu oan nia eskola.
Hataan ba preokupasaun ne’e, Administradór Postu Administrativu Fohorem, Delfim Amaral, rekoñese kondisaun estrada husi aldeia Au-Laran liga mai iha suku Laktos no liga fali bá postu administrativu Fohorem ne’e aat grave.
“ Loos duni kondisaun estrada iha Aldeia Aululi, Suku Laktos, Postu Administrativu Fohorem Munisípiu Kovalima ne’e aat nune’e difikulta komunidade lori nia produtu lokál ba merkadu. Nune’e hanesan autoridade postu halo ona proposta liuhusi projetu Programa Nasionál Dezenvolvimentu Suku (PNDS) hodi nahe no liuhusi Projetu PDIM hodi halo reabilitasaun”, nia dehan.
Nia afirma, Governu iha ona planu atu foku ba hadi’a estrada no ponte husi postu to’o suku no aldeia sira hodi fasilita no ema no sasán sira.
Aldeia Aululin pertense ba iha Suku Laktos rasik husi Postu Administrativu Fohorem, Munisípiu Kovalima ho totál populasaun hamutuk 336 ho totál nia uma-kain hamutuk 94.
Notisia relevante: Autoridade Kovalima fó prioridade ba infraestrutura báziku
Jornalista: Celestina Teles
Editór: Florencio Miranda Ximenes
