DILI, 03 Fevereiru 2026 (TATOLI) – Prezidente foun Konsellu Administrasaun Rádiu Televizaun Timor-Leste, Empreza Públika (RTTL, E.P), Rosário da Graça Maia, simu ona termu entrega serbisu husi Prezidente sesante, Elizeu Isaac Fernandes, ne’ebé sasin husi Sekretáriu Estadu Komunikasaun Sosiál, Expedito Dias Ximenes.
Iha eventu ne’e, Prezidente Konsellu Administrasaun RTTL, E.P, Rosário Maia, hateten katak instituisaun ne’e iha ona progresu no sei kontinua dezenvolve saida mak prezidente sesante no ekipa uluk halo ona.
“Ha’u-nia prioridade mak fortalesimentu institusionál. Iha ne’ebá ita ko’alia kona-ba armoniza baze legál sira, atu fó biban ba RTTL hala’o nia knaar tuir vizaun no misaun hodi hakonu direitu no devér traballadór nian, nomós fó biban ba RTTL atu sai instituisaun ne’ebé dinámika no kria ambiente serbisu ne’ebé profisionál no étiku”, nia afirma iha Kaikoli, ohin.
Aleinde ne’e, hakarak espande RTTL ninia programasaun, tanba Timor-Leste tama ona ASEAN no agora iha era dijitál, empreza públika tenke sai moderna, kompetetiva, nomós sai duni kanál hodi konta rasik Timor-Leste nia dezenvolvimentu.
Iha marjen atividade ne’e, Sekretáriu Estadu Komunikasaun Sosiál, Expedito Dias Ximenes, hateten termu entrega serbisu ne’e halo atu prezidente foun bele hatene knaar saida mak sesante halo ona no saida mak presiza kontinua halo ka hadi’a, molok simu tomada pose.
“Ha’u sente ksolok tanba prezidente foun hato’o nia misaun, vizaun ho nia kompromisu oinsá lori RTTL, E.P ba oin tuir Dekretu-Lei númeru 42/2008, ne’ebé regula kona-ba transformasaun RTTL husi servisu públiku ba empreza públika”, Expedito Dias hateten.
Nia mós agrades ba prezidente sesante ne’ebé nafatin iha kompromisu atu apoia dirijente foun ba dezenvolvimentu RTTL nian. “Ha’u hein katak ho lideransa Rosário Maia nian RTTL la’o di’ak liután, serbisu hamutuk ho parseiru nasionál no internasionál”, nia espera.
Iha fatin hanesan, eis-Prezidente Konsellu Administrasaun RTTL, E.P, Elizeu Isaac, iha esperansa ba prezidente foun sei halo mudansa ne’ebé di’ak liután ba dezenvolvimentu institusionál.
Nia mós agradese ba Governu, tanba fó ona fiar durante tinan ida lidera RTTL, hodi dehan atu serbí Estadu la presiza hetan kargu, maibé bele serbí nafatin liuhusi atividade saida de’it.
“Oin ha’u lori ha’u-nia naran prontu nafatin apoia RTTL bainhira de’it mak presiza ha’u-nia tulun. Prontu hamutuk halo mudansa ba RTTL, husik aat mak ha’u lori, di’ak ne’e iha ne’e atu halo mudansa ba oin”, nia realsa.
Lembra katak, iha loron 26 Fevereiru 2025, Konsellu-Ministru, nomeia Elizeu Isaac Fernandes, ba Prezidente Konsellu Administrasaun RTTL, E.P ho mandatu tinan haat hafoin ezonera José Belo husi kargu.
Nune’e, iha loron 27 Janeiru 2026, nafatin liuhusi reuniaun Konsellu Ministru estraordináriu aprova projetu Rezolusaun Governu ne’ebé aprezenta husi Ministru Prezidénsia Konsellu Ministru, Agio Pereira, no Sekretáriu Estadu Komunikasaun Sosiál, Expedito Dias Ximenes, determina ezonerasaun ba atuál Prezidente Konsellu Administrasaun (RTTL, EP), Elizeu Isaac Fernandes, no nomeia Rosário da Graça Maia hodi asume kargu nu’udar Prezidente Konsellu Administrasaun foun ba empreza publika radiodifuzaun ne’e nian ho mandatu tinan haat.
Notísia relevante: Konsellu Ministru nomeia Rosario Maia lidera RTTL, E.P
Jornalista: Arminda Fonseca
Editora: Maria Auxiliadora
