KOVALIMA, 05 Fevereiru 2026 (TATOLI) – Autoridade Munisípiu (AM) Munisipiu Kovalima liuhusi Servisu Munisipál Protesaun Sivíl no Dezastre Naturál, iha 2025 to’o 2026 ne’e fó ona apoia emejénsia ba vítima dezastre naturál hamutuk 260 iha Kovalima .
Diretór Servisu Munisipál Protesaun Sivil Jestaun Dezastre Naturál, João Martins, esplika katak, Autoridade fó apoiu ba vítima dezastre naturál ho tipu dezastre sira hanesan,Dezastre Naturál Inundasaun, anin sobu no ahi han uma.
“Família vítima dezastre naturál ne’ebé mak durante ami fó apoiu emerjénsia iha 2025 to’o tinan ne’e ba xefe família hamutuk 260 ho tipu dezastre ne’ebé mak la hanesan maibé maioria ne’e tipu dezastre inundasaun ne’ebé akontese iha postu administrativu Suai no Zumalai hanesan estraga sasan dapur, natar no animál,” Diretór Servisu Munisipál Protesaun Sivil no Jestaun Dezastre Naturál, João Martins informa ba jornalista TATOLI, IP,iha Bairru Kosta-Suai, ohin.
Autoridade nia preparasaun atu halo prevensaun ba dezastre naturál mak kontinua disemina informasaun ba komunidade no atividade prevensaun hodi organiza komunidade hamoos baleta iha fatin ne’ebé mak risku ba dezastre naturál.
“Atividade disemina informasaun iha 2025 ne’e, ami hala’o atividade disemina informasaun kada trimesterál, ami hala’o iha suku rua ne’ebé ami kofre iha suku hanesan iha Suku Suai Loro, postu Suai, Suku Maudemo Kasabauk husi postu Tilomar no Suku Lour Tashilin ho Raimea,” nia dehan.
Tuir dadus iha 2024 ne’e Autoridade Munisípiu Kovalima liuhosi Servisu Munisipál Protesaun Sivíl no Dezastre Naturál fó apoiu ai-han ho la’os ai-han ba família afeitadu dezastre naturál hamutuk 726 mai husi postu administrativu hitu.
Família vítima dezastre naturál husi postu hitu ne’e hanesan husi postu administrativu Suai 379, Postu Administrativu Maucatar 26, Fatululik Tolu, Fohorem haat, Fatumea lima, Tilomar 52 no husi postu administrativu Zumalai hamutuk 257.
Jornalista: Celestina Teles
Editór: Florencio Miranda Ximenes
