BOBONARU, 06 Fevereiru 2026 (TATOLI)-Diretór Servisu Saúde Munisípiu Bobonaru, Gil Bernardo Vicente, husu ba fámilia, liuliu inan-aman sira atu tau-matan ba oan sira hodi prevene moras dengue ne’ebé maoria afeta ba labarik ho idade 15 mai kraik.
Nia dehan daudaun ekipa Saúde Munisípiu Bobonaru halo ona promosaun saúde ba komunidade no iha eskola, tanba moras dengue afeta barak liu ba labarik
“Se bele [labarik sira] bá eskola tenke kose replente, nune’e bele prevene-an husi susuk tata, tanba ita hare susuk ida-ne’e komesa barak”, nia sujere.
Notísia relevante: Ospitál Referénsia Maliana rejista pasiente dengue 28 no 21 rekuperadu
Daudaun ne’e, moras dengue identifika iha postu administrativu Bobonaru, Kailaku, Balibó no barak liu Maliana, partikularmente iha suku Ritabou, Holsa, no Odomau.
Nia dehan moras ne’e maioria afeta labarik sira tanba halimar livremente halimar iha ambiente foer. “Ne’e tanba falta kontrolu husi inan-aman. Ladún atensaun ba sira tau faru liman-naruk, depois halimar iha fatin susuk moris ba, posiblidade sira hetan tata husi susuk”, dehan.
Atu prevene moras ne’e, ekipa saúde halo ona intervensaun liuhusi atividade fahe abate no halo fumigasaun iha área risku.
Komunidade Maliana, Jacinta Soares, deklara prontu atu aplika medidas preventive sira ho maneira rasik. “Ami rona ona sira saúde aviza ho karreta tama-sai bairru, no mós rona informasaun iha rádiu ho televizaun. Ba oin ne’e ami sei halo tuir saida mak sira hato’o, hamoos uma, sasán a’at sira, uza moskitereu, tanba ita haree moras ne’e agora sa’e maka’as. Se ita la prevene, perigu ba ita nia vida, liuliu ita nia-oan sira ki’ik ne’”, nia salienta.
Tuir dadus Servisu Saúde Munisípiu Bobonaru, dezde Janeiru rejista moras dengue 24, kompostu husi mane 15 no feto sia. Pasiente hirak ne’e hetan ona tratamentu no maioria rekuperadu.
Notísia relevante: Saúde Bobonaru rejista kazu dengue 16
Jornalista: Sergio da Cruz
Editora: Maria Auxiliadora
