AILEU, 07 Fevereiru 2026 (TATOLI)–Prezidente Autoridade Munisípiu (PAM) Aileu, João Bosco dos Santos solisita Primeiru-Ministru (PM), Kay Rala Xanana Gusmão, atu konsidera estrada urbana Munisípiu Aileu hanesan mós ho munisìpiu seluk ne’ebé hahú ona lansamentu.
“Ami rekomenda hela ba Primeiru-Ministru Xanana, karik tempu sira tuirmai, tau mós konsiderasaun ba ami-nia estrada urbana iha Aileu,” nia hatete ba jornalista sira iha EBF CONCIN, Suku Bokolelu, Postu Administrativu Laulara, Munisípiu Aileu, Sábadu ne’e.
Tuir PAM Aileu katak orsamentu ba konstrusaun estrada urbana Aileu ho kilómetru 18 ho nia osan kuaze millaun $8.
“Tuir ha’u hatene orsamentu ne’ebé aprova ona ba konstrusaun estrada urbana Aileu kuaze millaun $8. Maibé, Governu sei fó uluk oportunidade ba Ermera, Baukau. Ha’u espera katak tinan-ne’e tenke halo ona lansamentu tanba orsamentu aprovadu ona,” nia esplika.
Notísia relevante: PM Xanana Gusmão lansa reabilitasaun estrada urbana Baukau
Autoridade Munisípiu Aileu ne’e hatutan, projetu estrada liga bá postu sira hanesan Lekidoe, Remexiu no Laulara besik fanaliza ona.
“Estrada Aileu Vila liga bá Lekidoe fulan rua tan konklui ona. Ida-ne’e empreza Xineza mak konstrui ho orsamentu millaun $22. Nune’e mós Aileu vila liga ba Remexiu mós atu finaliza ona. Obra ida-ne’e ho orsamentu millaun $4 no mos estada Laulara sei finaliza iha tinan ne’e,” nia realata.
Aleinde ne’e, Autoridade Munisipál Aileu ne’e rekomenda ba Primeiru-Ministru, Kay Rala Xanana Gusmão, atu konstrui terminál pasajeiru rai-klaran nian iha ponte Kasnafar nia sorin, nune’e konsetra transposrte ne’ebé maihusi Munisípiu Kovalima, Manufahi no Ainaru.
“Tanba liga ho ida-ne’e atu prepara ami-nia kondisaun ba desentralizasaun no podér lokál, entaun mínimu ita tenke kria kondisaun atu hetan reseita,” João Bosco tenik.
Tuir nia, bainhira Governu konstrui terminál iha Kasnafar, populasaun ne’ebé partense ba área refere bele hetan reseita.
Prezidente Autoridade Munisípiu ne’e sei hato’o proposta pur eskrita ba Primeiru-Ministru atu tetu, hodi harii terminál ba rai-klaran nian iha terminál Kasnafar, atu bus sira labele tama liubá Dili.
“Ida-ne’e fó prioridade ba mikrolete sira atu lori ema ba laran. Ida-ne’e vantajen boot ida atu hamenus engarrafamentu iha Dili laran,” João Bosco subliña.
Entretantu, Munisípiu Aileu kompostu husi Postu Administrativu haat (4) kompostu husi Aileu Vila, Laulara, Lekidoe no Remexiu, suku iha 35, aldeia 1.444 ho nia populasaun hamutuk 61.171
Jornalista: Osória Marques
Editór: Xisto Freitas da Piedade
