AILEU, 07 Fevereiru 2026 (TATOLI)–Xefe Suku Bocolelo, Postu Administrativu Laulara, Munisípiu Aileu, Januario Guterres Pereira husu Governu liuliu Xefe Governu, Kay Rala Xanana Gusmão atu halo morru protesaun ba mota Bokelolo ne’ebé sei fó ameasa ba Eskola Bázika Filiál CONCIN.
“Ami hanesan lideransa komunitária, hakarak fó hatene hela katak ita-nia eskola ne’e konstrui ona, maibé besik hela mota no laiha morru protesaun ruma atu salva ita-nia eskola ne’e inklui uma komunidade ne’ebé besik,” nia dehan ba jornalista sira iha Suku Bokelolo, Sábadu ne’e.
Nia dehan, hanesan autoridade lokál aprezenta ona ba autoridade munisípiu, maibé tanba orsamentu boot liu, nune’e husu Primeiru-Ministru atu tau ba prioridade iha Governu Dasiak ne’e.
Hatán ba ketaun ne’e, Prezidente Autoridade Munisipiu Aileu, João Bosco dos Santos, hateten autoridade munisipál toma nota no sei hato’o pedidu ba Ministériu Obra Públika (MOP) no Ministériu Planeamentu Investimentu Estratéjiku (MPI) atu bele tetu.
“Ita nafatin toma nota. Ita sei halo proposta atu submete ba Ministériu Obra Públika ho Ministériu Planeamentu Investimentu Estratéjiku atu tetu. Se sira konsidera bele haruka parte téknika mai haree. Se orsamentu ki’ik ita bele tau iha planu asaun munisipál. Se orsamentu boot ita hato’o proposta,” nia subliña.
Nia hatutan, la’ós ba tinan ne’e, maibé sei tau ba planu asaun 2027.
“Karik emerjénsia ita bele konsidera, maibé se la emerjénsia ita sei tau iha planu asaun, depoiz lori bá autoridade munisípiu atu hetan apresiasaun husi Konsellu Konstrutivu Munisipál. Bazeia ba ida-ne’e mak ita halo proposta lori bá ministériu,” nia hakotu.
Jornalista: Osória Marques
Editór: Xisto Freitas da Piedade
