DILI, 08 Fevereiru 2025 (TATOLI)–Governu liuhosi Ministériu Juventude, Desportu, Arte no Kultura (MJDAK) husu Federasaun Futeból Timor-Leste (FFTL) atu kontinua halo kooperasaun serbisu ho Governu hodi dezenvolve futeból iha Timor-Leste.
Ministru Juventude, Desportu, Arte no Kultura (MJDAK), Nelyo Isaac Sarmento iha esperansa ho rezultadu kongresu ordináriu FFTL nian hodi hili estrutura ba períodu tinan-haat (2026-2030) bele hatudu símbulu unidade liuliu dezenvolve modalidade futeból iha Timor-Leste
“Ha’u hakarak fó-atensaun dala ida tan ba Prezidente FFTL, úniku dalan ida de’it atu susesu, mai ita hamutuk,” Nelyo hateten bainhira partisipa iha kongresu ordináriu FFTL ba da-XIII iha Palm Springs Hotel, Markoni, Domingu (08/02/2026).
Notísia relevante: Nilton Gusmão kompromete sei eleva prestasaun futeból Timor-Leste
Nia relata funsaun Governu atu akumula organizasaun hotu-hotu liuliu atu eleva modalidade desportu iha Timor-Leste hanesan halo konkordánsia ho FFTL liuhosi kooperasaun sira hanesan atribuisaun uzu Estádiu Munisipál Dili nune’e dezenvolve futeból iha futuru.
Governante ne’e argumenta kooperasaun entre Governu ho FFTL mezmu neineik maibé beibeik tanba desportu prestíjiu iha Timor-Leste.
“Investimentu la’ós mai husi de’it ita-nia parseiru maibé husi mós ita-nia Governu, tanba ne’e ita presiza organizasaun ida-ne’ebé metin hodi hanoin ida de’it ba dezenvolvimentu futeból,” Nelyo akresenta.
Iha fatin hanesan, Prezidente FFTL, Nilton Telmo Gusmão dos Santos kompromete sei kontinua koopera ho Governu liuhusi MJDAK inklui Ministériu Justisa (MJ) nune’e bele eleva prestasaun futeból durante mandatu tinan-haat.
“Ho unidade, persisténsia no serbisu hamutuk ne’ebé apoia husi parseiru nasionál, internasionál no Governu, ita fiar katak futeból Timor-Leste sei kontinua evolui, sai motór dezenvolvimentu ba dalan orgullu nasionál,” Nilton Gusmão hateten.
Entretantu, FFTL hamutuk ho MJDAK realiza ona kooperasaun iha Setembru tinan-2025 liuhusi akordu utilizasaun ba Estádiu Munisipál Dili iha-ne’ebé konteúdu deskreve MJDAK nu’udar entidade relevante aseita fó ba FFTL kona-ba uzu Estádiu Munisipál Dili ho taxa durante tinan-25.
Akordu referida ho objetivu rekonstrusaun, manutensaun no utilizasaun hala’o atividade futeból públiku, privadu nasionál no internasionál.
Aleinde ne’e, parte rua estabelese Konsellu Administrasaun Estádiu Munisipál Dili hamutuk membru na’in-lima kompostu husi MJDAK ema na’in-rua no FFTL na’in-tolu iha-ne’ebé FFTL responsabiliza ba utilizasaun, manutensaun no área hotu hale’u Estádiu Dili inklui pista atletizmu nian.
Jornalista: Natalino Belo
Editór: Xisto Freitas da Piedade
