OEKUSI, 09 Fevereiru 2026 (TATOLI) – Durante fulan-Janeiru 2026 ne’e, Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), rejista kazu hamutuk 22 inklui kazu abuzu seksuál hasoru minoridade iha tolu.
Komandante PNTL Oekusi, Superentendente Asistente Polísia, Angelo Quelo, informa, katak kazu hirak-ne’e, Komandu Rejionál rejista liuhusi Seksaun Investigasaun Kriminál (SIK), rekolla faktu no evidénsia sira iha térrenu no mós simu direita keixa mai husi vítima sira, hodi prosesu tuir lei.
“Husi kazu kriminál 22 ne’e maioria violénsia doméstika iha 12, asalta malu lima, abuzu seksuál kontra minoridade iha kazu tolu, kazu kontra-bandu rua, ne’ebé ita laiha kazu asidente,” nia realat ba jornalista sira iha Oekusi, ohin.
Notísia relevante:Tinan ne’e, PNTL Oekusi rejista kazu abuzu seksuál kontra minoridade 26
Autoridade Polísia ne’e esplika, kazu violénsia doméstika aas tanba iha motivu tolu mai husi problema ekonomia família.
“Kazu violénsia doméstika kuandu ita haree, primeiru falta informasaun, daruak, ekonomia uma-kain la sufisiente atu atende nesesidade família, datoluk mak ita timoroan nia kostume ida mak atu koko foti ida-ne’e, foti ida-ne’ebá maske nia forsa la to’o atu koko buat sira-ne’e inklui komunikasaun laiha ármonia, entaun husi buat tolu ne’e mak mosu violénsia doméstika,” nia afirma.
Notísia relevante:PNTL Oekusi rejista kazu 300-resin, na’in-13 tama prizaun
Komandante ne’e subliña, esforsa ne’ebé PNTL hala’o nia kna’ar ba kazu sira-ne’e mak liuhusi prevensaun. Prevensaun ne’e realiza liuhusi sistema polísia komunitária ba siensibilizasaun no sosialiazasaun alvu ba suku no aldeia sira, la’ós polísia de’it maibé husi parseiru Organizasaun Naun Governamentál (ONG) mós hala’o atividade hanesan, atu oinsá bele hamenus no prevene situasaun ne’e.
“Tanba bainhira ita fó sensibilizasaun ba sira, hanesan motivasaun ba sira, neineik ema hotu hatene katak, kuandu enfrenta problema hanesan ne’e, ha’u atu lori kazu ne’e ba ne’ebé, tanba kazu sira-ne’e maioria PNTL mak tuun ba terrenu hodi rekolla,” nia hateten.
Komandante Quelo konfirma katak, husi kazu kriminál 22 ne’e, tama ona iha prosesu no balun enkamiña ba iha Ministériu Públiku.
Tuir nia, iha 2025, hahú husi fulan-Janeiru to’o Novembru 2025, PNTL Oekusi rejista kazu hamutuk 333 maihusi kazu tipu haat, no na’in-13 konsege tama prizaun. Husi kazu tipu haat ne’e mak hanesan violénsia doméstika, asalta malu, kontra-bandu no abuzu seksuál hasoru minoridade.
Notísia relevante:Komandu PNTL nomea Inspetór Xefe Angelo Quelo ba Komandante Interinu Oekusi
Entretantu, totál membru PNTL ativu iha Komandu PNTL Oekusi hamutuk na’in-127, ne’ebé kolokadu iha kuartel PNTL rejionál, no eskuadra sira iha sub-rejiaun haat inklui Ofisiál Polísia Suku 20.
Jornalista: Abílio Elo Nini
Editór: Rafael Ximenes de A. Belo
