VIKEKE, 09 Fevereiru 2026 (TATOLI)—Ekipa Sekretaria Estadu Kooperativa (SEKoop) nasionál no akompañadu husi Autoridade Munisípiu Vikeke, Segunda ne’e, oferese formasaun jestaun kooperativa nian ba kooperativu rua iha Suku Matahoi, Postu Administrativu Uatulari, Munisípiu Vikeke.
Diretór Formasaun Nasionál SEKoop, Gil Bento esplika formasaun sira-ne’e SEKoop la’ós foku ba Kooperativa Uniaun sira de’it, maibé tinan ida-ne’e orientasaun husi Sekretáriu Estadu Kooperativa katak kada postu tenke iha kooperativa Multisetoriál ne’ebé halai ba produsaun.
“Tanba ita hatene rai parte leste ne’e rai buras, maibé ita ladún utiliza ho di’ak. Tan ne’e mak ami mai introdús ho inan-aman agrikultór sira,” Gil Bento hateten iha abertura formasaun iha Sentru Kooperativa Multisetóral Hakbiit Família, Postu Uatulari, Segunda ne’e.
Diretór ne’e haktuir iha tempu okupasaun Indonézia inan-aman sira halo servisu kultivu hodi fó han FALINTIL sira, agora tempu ukun-an ne’e nafatin kuda hodi transforma produsan fó benefísiu liuhusi kooperativa.
“Formasaun ne’ebé ami oferese ne’e ba Kooperativa Multisetoriál Hakbiit Família ho matéria produsaun no matéria jestaun kooperativa nian. Aleinde ne’e, ami mós fó formasaun ba Grupu Belia ne’ebé sira hakarak transforma ba Kooperativa Uniaun Kréditu, ho matéria bázika kona-ba harii kooperativa no prenxementu formuláriu sira no forma estrutura. Depois ida-ne’e hotu, iha fulan ida-ne’e, Sekretáriu Estadu Kooperativu sei mai pose estrutura kooperativu rua ne’ebé estabelese iha Uatulari,” nia hato’o.
Gil relata formadór maihusi SEKoop nasionál hamutuk na’in-haat (4), koloka na’in-rua iha Kooperativa Multisetoriál no ida seluk ba Grupu Belia, formasaun hala’o durante loron lima (09-13 Fevereiru).
Iha fatin hanesan, Reprezentante Kooperativa Multisetoriál Hakbiit Família (K-MSHF), Jacinto Pinto hateten tempu pasadu hahú halo kultiva, agora kontinua avansa halo produsaun hanesan kuda modo, hare no haki’ak animál sira.
“Entaun kuandu la’o di’ak presiza SEKoop nia tulun hodi buka merkadu ba ami, atu produtu ne’ebé ami prodús ema bele sosa. Ami hakarak prodús hare fini ba tinan ida-ne’e no atividade ortikultura atu hadi’a ami-nia ekonomia família. Ami agradese ba SEKoop nasionál ne’ebé mai oferese formasaun no fó korajen ba ami atu halo produsaun,” nia hato’o.
Entretantu, formasaun ne’e SEKoop realiza iha fatin rua. Ida, hala’o iha área Mauselok mak K-MSHF ho totál membru 30 no formasaun ida seluk hala’o iha área Belia, Suku Matahoi, ho totál membru 50.
Jornalista: Vitorino Lopes da Costa
Editór: Xisto Freitas da Piedade
