BOBONARU, 11 Fevereiru 2026 (TATOLI)-Komunidade sira solisita ba Diresaun Servisu Munisipál Água, Saneamentu no Ambiente (SMASA) munisípiu Bobonaru atu harii fatin lixu nian, iha postu administrativu Balibó, hodi halo tratamentu ba fo’er sira ne’ebé daudaun ne’e naklekar iha dalan-ninin.
Rezidente Balibó, Deonizio de Fátima, hateten durante ne’e populasaun so’e de’it lixu iha estrada-ninin husi diresaun Balibó Vila bá Batugadé, tanba seidauk konstrui lixeiru.
Notísia relevante: APA Maliana konsensializa komunidade kona-ba limpeza no labele soe lixu arbiru
“Ami husu ba Governu, liuliu Diresaun Saneamentu Munisípiu Bobonaru atu halo tiha fatin lixu ida muru hale’u mai ami postu Balibó para ema so’e lixu iha fatin ida de’it no fásil ita atu sunu ka jere”, nia hato’o ba Tatoli, iha Maliana.
Nia dehan so’e lixu arbiru iha fatin públiku fó impaktu ba ambiente la saudavel no hatudu imajen la di’ak. “Balibó ne’e besik kedas fronteira. Ha’u sente lixu nakonu iha dalan-ninin ne’e sira husi nasaun viziña haree ladún di’ak. Espera ba oin Governu bele hare asuntu ne’e, tanba ne’e estrada protokolu”.
Ba kestaun ne’e, Xefe Departamentu Planeamentu SMASA munisípiu Bobonaru, Adriano Belo, rekoñese katak durante ne’e postu Balibó laiha fatin lixeira nian, tanba ne’e konsidera hodi tau iha planu orsamentu ba 2027.
“Ita sei halo muru hale’u, tanba haree husi parte Batugadé mai Balibó ne’e ema so’e lixu sira ne’e arbiru de’it iha dalan-ninin”, nia dehan iha salaun Maria Tapó, ohin.
Tuir planu, tinan ne’e SMASA munisípiu Bobonaru sei konstrui fatin lixu haat iha kapitál Maliana.
Notísia relevante: PN-BESI-TL sujere Governu aloka orsamentu 3% ba bee, saneamentu no ijene
Jornalista: Sergio da Cruz
Editora: Maria Auxiliadora
