BOBONARU, 15 Fevereiru 2026 (TATOLI)-Governadór Banku Sentrál Timor-leste (BCTL, sigla portugés, Helder Lopes, pronunsia aprovasaun lisensa preliminár temporária ba instituisaun Mikro Finanseira Kaebauk Investimentu Finansa hodi prepara atu sai banku iha tempu badak.
Rezultadu aprovasaun ne’e anunsia iha ámbitu inaugurasaun edifísiu sukursál foun Kaebauk Maliana, iha munisípiu Bobonaru, sábadu ne’e.
Notísia relevante: BCTL apoia inisiativa Kaebauk transforma an ba banku
“Banku Sentrál fó anúnsiu ida ba ita-boot sira, ami aprova ona lisensa temporária para Kaebauk sai Banku. Parabéns ba ita-boot sira”, nia hato’o.
Antigu Vise-Ministru Finansa ne’e subliña katak lisensa preliminár ne’e prazu tinan ida no sei fó tan lisensa definitivu bainhira Kaebauk prienxe ona rekizitu ne’ebé BCTL prepara.
Tuir nia, atu sai banku, Kaebauk tenke aliña ho matadalan no estratéjia fundamentál tolu ne’ebé Banku Sentrál trasa mak espande merkadu kréditu iha Timor-Leste ba empreza sira, liuliu ba sira ne’ebé halo negósiu mikro pekena iha área rurál.
Aleinde ne’e, Keabauk tenke dijitaliza servisu finanseiru hanesan estabelese sistema Mobile Banking no Internet Banking hodi hakbesik servisu ba kliente sira no estratéjia ikus liu mak Inkluzaun Finanseira ho maneira prezensa dijitál no prezensa fizíku liuhusi estabelese ajente banku iha postu administrativu no suku sira.
“Banku Sentrál mai ho prinsípiu ida kuandu ami deside fó xave ba imi, entaun imi tenke halo karreta ne’e moris no tenke la’o. La’e ami fó lisensa ba imi atu halo karreta la moris, satán la la’o. Ami fó lisensa ba imi hakarak imi la’o, la’ós para ho imi-nia atividade mikro finansa, imi tenke sai banku”, nia afirma.
Biban ne’e, Ministru Komérsiu no Indústria, Filipus Nino Pereira, hateten rezultadu ne’e nu’udar prova ida husi Kaebauk hodi dezafia nia-an atu hakat ho konfiansa tomak ba oin.
Governante ne’e afirma katak ho estatutu foun ne’e, Kaebauk sai ona hanesan feto bonita ida ne’ebé atrai ema barak.
“Kaebauk tenke hadi’a an para bonita liután, hadi’a an para oinsá atitude ne’e di’ak liután iha atendimentu, iha komunikasaun iha nia produtu primadona ida hodi bele atrai kliente barak, tanba ohin loron kompetidór barak, ita tama ona ba ASEAN, koalia kona-ba merkadu dijitál ne’e hakarak ka lakohi tenke adapta iha prosesu ida-ne’e”, nia sujere.
Diretór-Ezekutivu Kaebauk, Ângelo Bere Cau Soares, haksolok tebes ho novidades ne’e, tanba hetan tan pasu ida atu konkretiza mehi sai banku iha Timor-Leste.
Nia promete katak Kebauk preparadu atu sai banku ein termu rekursu umanu no finanseiru. “Ha’u bele dehan lisensa ida-ne’e hanesan entrega xave karreta mai ami. Kaebauk prontu simu hodi hamoris karreta ne’e, prontu atu rodajen durante tempu determinadu. Depoizde rodajen ami sei iha mekániku treinadu para afina nia prafuzu sira mamar durante rodajen. Ami mós iha kondutór ne’ebé profisionál atu lori karreta ida-ne’e halai iha dalan ne’ebé luan hodi kompete ho karreta seluk”, nia promete.
Daudaun ne’e Kaebauk prepara ona ajenda prinsipál atu dijitaliza servisu finanseiru ho efisiente no asesivel ba ema hotu-hotu ho inisiativa sira hanesan servisu P-24, R-Timor, Sistema Pagamentu Lalais no servisu seluk ne’ebé daudaun ne’e operadór telekomunikasaun sira halo hanesan MOSAN.
Kaebauk mós sei fasilita Automatic Teller Mechine (ATM) ba kliente sira, establese Point Off Sales (POS), Mobile Banking, Internet Banking ka koñesidu Banku iha Ita-nia Bolsu hodi fasilita tranferénsia no halo pagamentu.
Internalmente, Kaebauk mós halo esforsu atu automatiza no dijitaliza servisu internál hotu-hotu hodi bele servisu lalais no kompetetivu. Kaebauk mós prontu atu lidera promosaun Inkluzaun Finanseira iha Timor-leste.
Tuir dadus, Kaebauk iha numeru funsionáriu 330 no kliente 22.561. Kabeauk mós oferese ona kréditu millaun $45,8.
Notísia relevante: BCTL hili Kaebauk sai vensedór dahuluk ba Central Bank Award 2022
Jornalista: Sergio da Cruz
Editora:Maria Auxiliadora
