LAUTÉM, 19 janeiru 2025 (TATOLI)—Banku Sentrál Timor-Leste (BCTL-sigla portugés) komprimitidu apoia intensaun Kaebauk Investimentu no Finansa, SA, ne’ebé hakarak transforma an ba banku iha futuru.
“Nu’udár instituisaun reguladora, ami loke odamatan ba ita-boot sira no hakarak hasa’e Kaebauk ba banku,” Governadór BCTL, Helder Lopes, hateten liuhusi ninia deskursu iha seremónia inaugurasaun edifísiu foun sukursál Kaebauk, iha suku Fuiloro, munisípiu Lautém, sábadu (18/01/2025).
Nia esplika, Kaebauk ninia vizaun hakarak sai banku ne’e tenke prenxe regra ne’ebé BCTL estabelese no regra ida hosi regra sira seluk BCTL nian mak tenke estabelese edifísiu iha kada munisípiu.
Helder informa katak BCTL sei suporta funsionáriu no jestór Kaebauk hodi prepara di’ak liután iha ámbitu preparasaun ba banku.
Helder kompara merkadu finanseira iha Timor-Leste ho jogadór, katak, iha jogadór na’in lima maibé jogadór lokál na’in ida de’it nune’e Kaebauk nu’udár jogadór potensiál no oportunidade atu aumenta tan jogadór lokál.
Notísia relevante: Kaebauk loke edifísiu foun iha Lautém
“Hanesan instituisaun reguladora, ami-nia papél mak asegura katak jogadór hotu-hotu iha oportunidade hanesan atu kompete iha merkadu finanseiru,” nia subliña.
Nia solisita Kaebauk atu aliña prioridade fundamentál tolu hosi BCTL hanesan expanda kréditu, inkluzaun finanseira no dijitalizasaun, nune’e husu Kaebauk atu futuru presiza fó prioridade ba dijitalizasaun finanseira hodi fasilita kliente sira halo tranzasaun.
Chief Executive Officers Kaebauk, Angelo B. C. Soares, hateten oras ne’e daudaun Kaebauk halo preparasaun atu transforma ba banku liuhusi estabelesementu sukursál iha munisípiu sira no prepara mós infraestrutura Information Tecnology (IT) hanesan CBS (Core Banking System) no kapasitasaun rekursu umamu liuhosi kooperasaun ho Lembaga Pengembangan Perbankan Indonesia (LPPI).
Angelo esplika katak razaun Kaebauk hakarak transforma an ba banku makro finansa iha Timor-Leste tanba bele simu depózitu liu millaun ida, iha-ne’ebé sei diminui impréstimu hosi rai-li’ur ne’ebé nia jurus aas.
Razaun seluk, nia hatutan, Kaebauk iha konfiansa ba ekipa ne’ebé iha hodi hala’o komersiál finansa hanesan banku seluk hala’o iha Timor-Leste.
Tuir planu, Angelo tenik, Kaebauk sei submete aplikasaun iha fulan-fevereiru bazeia ba kritériu no rekizitu ne’ebé fó sai hosi BCTL hodi prosesa transformasaun ba banku.
Kaebauk Investimentu no Finansa, SA, iha funsionáriu nível nasionál hamutuk 362, totál kliente nível nasionál hamutuk 20.268. Osan sírkula iha munisípiu liuhosi branch 21 hamutuk millaun 34.4.
Hosi orsamentu hirak-ne’e, númeru devolve kréditu nível nasionál hamutuk pursentu 97.70, portfóliu nasionál pursentu 2.27.
Entretantu, kritéria sira seluk hosi BCTL nian atu harii banku mak hanesan estrutura sosietária, ámbitu hosi atividade nian, estatutu, informasaun relativa ba asionista no administradór sira, planu negósiu inklui projesaun finanseira no jestaun.
Jornalista: Natalino Belo
Editór: Xisto Freitas da Piedade