LAUTÉM, 19 janeiru 2025 (TATOLI)—Kaebauk Investimentu no Finansa, SA, sábadu (18/01/2025), loke nia edifísiu foun sukursál nian iha munisípiu Lautém.
Chief Executive Officers Kaebauk, Angelo B. C. Soares, sente orgullu ba loron istóriku ne’e tanba sai momentu espesiál hodi loke odamatan foun ba kreximentu ekonomia povu Lautém bazeia ba kompromisu Kaebauk nian.
“Loron ida-ne’e la’ós atu loke odamatan edifísiu foun maibe atu loke kreximentu no dezenvolvimentu ba povu Lautém,” Angelo ko’alia liuhusi nia deskursu iha seremónia inaugurasaun edifísiu foun Kaebauk, iha Lautém.
Nia esplika, abertura edifísiu foun nu’udár Kaebauk nia kompromisu atu hala’o serbisu finanseiru ne’ebé asesível ba ema hotu.
“Kaebauk komprimitidu katak liuhosi sukursál ne’e bele fó kontribuisaun boot liután hodi apoia dezenvolvimentu ekonomia iha munisípiu Lautém liuhusi papél fornese kréditu no tranzasaun finanseira ba komunidade no emprezáriu sira,” Angelo subliña.
Angelo solisita Autoridade Administrasaun Munisipál Lautém hamutuk ho komunidade atu kontribui hanesan tau-matan no kuidadu funsionáriu Kaebauk nune’e bele hala’o atendementu ba povu Lautém ho di’ak.
Iha fatin hanesan, Governadór Banku Sentrál Timor-Leste (BCTL-sigla portugés), Helder Lopes, hateten nu’udár instituisaun reguladór finanseira iha Timor-Leste, BCTL hakarak kongratula no fó parabéns ba Kaebauk relasiona ho inaugurasaun edifísiu foun iha Munisípiu Lautém.
“Ho inaugurasaun ida-ne’e hatudu katak Kaebauk kontinua la’o bá oin,” Helder tenik.
Tuir nia, prezensa Kaebauk nu’udár prezente tanba sei apoia kreximentu ekonomia povu Lautém tanba fó oportunidade ba povu atu hadi’a moris hanesan impréstimu no depózitu iha futuru bainhira Kaebauk transforma ona ba banku.
Kaebauk Investimentu no Finansa, SA, iha funsionáriu iha Lautém hamutuk ema na’in 13 kompostu mane sia no feto haat. Totál funsionáriu nível nasionál hamutuk 362, totál kliente nível nasionál hamutuk 20.268. Enkuantu, iha Lautém kliente hamutuk 1.371. Osan sírkula iha munisípiu liuhosi branch 21 hamutuk millaun 34.4 no iha Lautém hamutuk millaun 2.1.
Notísia relevante: Kaebauk lansa konstrusaun edifísiu foun sukursál Maliana
Hosi orsamentu hirak-ne’e, númeru devolve kréditu nível nasionál hamutuk pursentu 97.70, iha Lautém pursentu 99.2, portfóliu nasionál pursentu 2.27 no sukursál Lautém pursentu 0.80.
Kaebauk hahú estabelese sukursál iha munisípiu Lautém iha fulan-marsu 2007 liuhosi Fundasaun Tuba Rai Metin. Durante besik dékada ida Kaebauk utiliza uma komunidade hodi hala’o atendementu ba komunidade liuliu negosiante ki’ik no médiu.
Notísia relevante: BCTL hili Kaebauk sai vensedór dahuluk ba Central Bank Award 2022
Kaebauk Investimentu no Finansa, SA, iha fulan-outubru tinan kotuk halo ona inaugurasaun edifísiu sukursál iha Rejiaun Administrativa Espesiál Oé-Cusse Ambeno (RAEOA) no inísiu janeiru iha Lautém. Tuir planu, iha fulan-agustu, tinan ne’e, inaugura tan edifísiu foun iha Bobonaro no novembru iha munisípiu Manatuto.
Jornalista: Natalino Belo
Editór: Xisto Freitas da Piedade
