BOBONARO, 28 outubru 2024 (TATOLI) – Institutu Mikro Finansa, Kaebauk Investimentu Finanseira (KIF), segunda ne’e lansa fatuk dahuluk ba konstrusaun edifísiu foun sukursál Maliana, munisípiu Bobonaro ne’ebé lokaliza iha área Ramaskora, suku Odomau.
Xefe Ezekutivu KIF, Angelo Bere Cau Soares, hateten obra ne’e marka inísiu ka kapítulu foun ida no kompromisu Kaebauk nia atu kontinua hadi’ak povu munisípiu Bobonaro nia moris liuhusi oferese kréditu finanseira.
Nia dehan, antes ne’e KIF estabelese edifísiu iha Holsa, maibé edifísiu ne’e la tuir kritéria ne’ebé KIF mehi atu sai banku iha futuru tanba espasu kloot.
“Espansaun ida-ne’e sei permite ami atu oferese servisu sira-ne’ebé di’akliu ba apoia negósiu lokál sira no kontribui ba dezenvolvimentu ein jerál iha munisípiu Bobonaro, ida-ne’e refleta ami-nia fiar iha Maliana ninia potensiál atu haburas kresimentu no prosperiedade iha rai Maliana,” Diretór Ezekutivu KIF hateten.
Sekretáriu Autoridade Munisípiu Bobonaro ba asuntu Administrasaun no Finansa, Domingos da Costa, agradese no apresia ba Kaebauk Investimentu Finanseira ne’ebé konsege realiza ona mehi atu harii infraestrutura ne’ebé ho espasu luan.
Autoridade Munisípiu Bobonaro sei apoia Kaebauk liuhusi halo sisializasaun ba líder komunitária sira hodi ko’alia ho komunidade sira atu mai kréditu hodi hadi’a moris.
“Kaebauk ninia edifísiu hamriik ona, seidauk banku mós ita bele dehan banku ona tanba investimentu ida-ne’e la’ós buat fasil, sé ita bele mai kuda iha-ne’e ita bele dehan fiar ona Kaebauk bele moris iha munisípiu Bobonaro,” nia dehan.
Obra ne’e konstrui husi empreza Brilho Unip Lda ho durasaun tempu fulan-ualu.
Enkuantu iha tinan 2025, KIF mós planu sei konstrui tán edifísiu foun iha munisípiu Manatuto.
Notísia relevante: BCTL hili Kaebauk sai vensedór dahuluk ba Central Bank Award 2022
Jornalista : Sérgio da Cruz
Editór : Evaristo Soares Martins
