DILI, 16 Fevereiru 2026 (TATOLI)-Ministra Finansa, Santina Cardoso, relata ba Parlamentu Nasionál kona-ba prosesu auditoria esterna ba Tribunál Kámara Konta.
Tuir rezolusaun ne’ebé Parlamentu aprova, Ministériu Finansa iha trimestre ikus tinan 2025 konsege hetan empreza internasionál ida atu halo auditoria ba tribunál hahú iha tinan 2018 to’o 2023.
“Ha’u fiar katak, iha fulan oin, sira bele finaliza sira-nia relatóriu finál. Foin daudaun sira mai ona halo aprezentasaun ba tribuná atu hetan nia kontraditóriu ba auditoria esterna”, nia hato’o iha ámbitu debate kona-ba Konta Jerál Estadu 2024 iha Parlamentu.
Tanba ne’e, bainhira finaliza sei fornese informasaun ba órgaun lejislativa ne’e no ba tribunál rasik.
Xefe bankada Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, ezije ba Governu atu halo lalais auditoria ba tribunál tanba Parlamentu rasik aprova ona rezolusaun no iha ona alokasaun orsamentu.
Lembra katak, iha 19 Marsu 2024, Parlamentu Nasionál liuhusi reuniaun plenária aprova projetu rezolusaun númeru 34/VI(1a) hodi rekomenda ba Governu atu halo auditoria independente ba jestaun Kámara Konta.
Auditoria finanseira ba tribunál atu prosede análize konta, situasaun finanseira no legalidade no regularidade ba operasaun ne’ebé realiza husi Kámara Konta no emite korrespondente pareser.
Notísia relevante: https://tatoli.tl/2024/03/19/pn-aprova-rezolusaun-husu-auditoria-indepedente-ba-kamara-konta/
Jornalista: Nelson de Sousa
Editora: Maria Auxiliadora
