BOBONARU, 16 Fevereiru 2026 (TATOLI) – Sekretariu Estadu Formasaun Profisionál no Empregu (SEFOPE), Rogério de Araújo Mendonça, inaugura ohin Sentru Formasaun Dalen Inglés iha munisípiu Bobonaru, ne’ebé lokaliza iha área Soso, aldeia Solugolo, suku Holsa, postu administrativumaliana Maliana.
Sekretáriu Estadu hateten sentru formasaun ne’e estabelese atu prepara joven sira-nia abilidade iha língua hodi responde ba ezijénsia merkadu traballu iha rai-laran no rai-li’ur, no mós atu redús joven sira konsetra de’it tuir formasaun iha Dili.
“Haree ba Programa Mobilidade Laborál bá iha Australia, Nova Zelándia, Korea, Japaun ida ne’e ema presiza tebetebes. Ita-nia joven sira ne’ebé atu bá kompete iha merkadu, tenke mai ho kualidade no esperensia ne’ebé di’ak”, nia hateten iha serimónia ne’e.
Notísia relevante: SEFOPE inaugura sentru formasaun dalen Inglés iha Kovalima
Governante ne’e afirma katak liuhusi programa ne’e mós bele fó oportunidade ba foinsa’e sira ne’ebé ramata formasaun iha sentru formasaun akreditadu hanesan CNFP Bekora no seluk tan atu implementa sira-nia abilidade no kompeténsia.
Sekretariu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, konsidera estabelesimentu sentru formasaun ne’e nu’udar oportunidade di’ak ba joven sira atu aproveita.
Júlio argumenta katak ho ezisténsia sentru formasaun ne’e bele reforsa tan munisípiu Bobonaru atu hakat ba podér lokál no desentralizasaun administrativa.
“Ami espera katak ho sentru formasaun ida-ne’e bele motiva liután joven sira atu mai tuir formasaun”, nia dehan.
Sentru formasaun ne’e konstrui husi formandu Sentru Nasionál Formasaun Profisionál(CNFP sigla portugés), Bekora-Dili, iha área konstrusaun sivíl sertifikadu nivel III no obra ne’e finansia husi SEFOPE ho apoia fundu husi Governu Austrália.
SEFOPE sei kontinua serbisu hamutuk ho Governu Austrália atu espande sentru formasaun ne’e iha munisípiu seluk.
Notísia relevante: SEFOPE sei espande sentru formasaun iha munisípiu
Jornalista: Sergio da Cruz
Editora: Maria Auxiliadora
