DILI, 19 Fevereiru 2026 (TATOLI) – Institutu Nasionál Estatístika Timor-Leste (INETL) rejista inflasaun 0,1% iha Índise Presu Konsumidór (IPK) fulan-Janeiru 2026, ne’ebé kompara ho fulan-Dezembru 2025 iha deflasaun 0,1%.
Tuir relatóriu INETL mudansa presu iha grupu hotu sa’e 0,1% tanba hetan kontribuisaun husi grupu hahán no bebidas la’ós alkólika 0,1%, hatais no sapatu 0,5%, alkoól no tabaku 0,4% no edukasaun 0,3%.
Ba grupu transporte tun 0,4%, rekreasaun no kultura 0,7% no ekipamentu no manutensaun mobilariu uma-laran 0,3%, ne’ebé sai hanesan mudansa kontráriu ba inflasaun grupu hotu mensal nian.
Nune’e, ba grupu hahán no bebida la’ós alkoólika sa’e 0,1% tanba hetan impaktu maioria husi subgrupu modo-tahan sa’e s0,4%, masin-midar, marmelada, bani-been, xokolate no hahán midar sa’e 0,6%, bee, bebidas, jus ai-fuan no modo-tahan sa’e s2,4%, mina no bokur sa’e 0,1%, no produtu ai-han sa’e 0,2%.
Ba subgrupu foos tun 0,1%, ai-fuan tun 0,8%, no susu-been, keiju no manutolun tun 0,6%, sai hanesan mudansa kontrariu ba inflasaun grupu hahán no bebidas la’ós alkoólika ba Janeiru 2026.
Mudansa persentajen IPK anuál sa’e 1,2% kompara entre fulan-Janeiru, tinan-2026 ho fulan-Janeiru, tinan-2025, hetan kontribuisaun husi grupu hahán no bebida la’ós alkoólika sa’e 2,3%, edukasaun 0,3%, ekipamentu no manutensaun mobilariu uma-laran 0,6%, uma 1,0%, transporte 0,2% no hatais no sapatu 0,3% ba anuál Janeiru 2026.
Grupu alkoól no tabaku tun 2,9% no komunikasaun tun 0,2%, sai hanesan mudansa kontráriu ba inflasaun grupu hotu ba anuál Janeiru 2026. Inflasaun Tradeable laiha mudansa 0,0% no non-tradeable sa’e 0,2% iha mensál.
Kompara entre fulan-Janeiru 2026 no Dezembru 2025, inflasaun tradeable sa’e 1,2% no non-radeable sa’e mós 1,2% iha anuál, kompara entre fulan-Janeiru 2026 no Janeiru 2025.
Notísia relevante: Timor-Leste rejista deflasaun 0,1% iha Dezembru 2025
Jornalista: Arminda Fonseca
Editora: Maria Auxiliadora
