BOBONARU, 19 Fevereiru 2026 (TATOLI) – Prezidente Autoridade Munisípiu Bobonaru, Paulo Moniz Maia, fó pose ba Quintino Santos de Jesus, hodi asume responsabilidade nu’udar Administradór foun Postu Administrativu Lolotoe, bazeia ba despaxu Ministru Administrasaun Estatál, Tomás Cabral, Nú. 05/M-MAE/XII/2025, loron 16 Janeiru 2026.
MAE nomeia Quintino de Jesus ba kargu Administradór Postu hodi substitui Administrador sesante, Sebastião Amaral, tanba to’o ona idade reforma no inklui hotu iha lista reformadu hahú fulan-Janeiru 2026. Nune’e, Governu presiza promove renovasaun kuadru Administrasaun Públika, nune’e hodi determina dezvinkulasaun no apozentasaun ba nia rekursu umanu neʼebé kompleta ona idade tinan 65.
Notísia relevante: Kondisaun estrada Zulo-il afeta ba folin foos iha Loloto’e sa’e $21
“Ho nune’e mak ministru liuhusi nia despaxu konsidera señor Quintino Santos de Jesus iha perfil adekuadu atu dezempeña funsaun hanesan Administradór Postu Administrativu, haktuir n.o 2 artigu 63. Dekretu-Lei númeru. 3/2016, 16 de Marsu, ho redasaun aprovada husi Dekretu-lei númeru 34/2025, 15 Outubru hodi deside ezonera Sebastião Amaral husi kargu Administradór Postu Administrativu Lolotoe, Autoridade Municipal de Bobonaro, no nomea fali Quintino Santos de Jesus hodi ezerse kargu”, Paulo Moniz Maia hateten iha intervensaun.
Nia esplika katak postu administrativu hanesan estensaun serbisu husi autoridade munisípal atu garante prestasaun servisu públiku ba komunidade iha nivel postu, tuir prinsípiu fahe kbiit Administrasaun Públika ne’ebé hakerek iha Konstituisaun RDTL iha artigu 5.
Paulo salienta katak Governu mós hasai Diploma Ministeriál N.ú. 85/2023 kona-ba desentralizasaun kompeténsia ba servisu munisipál hamutuk 20 no Diploma Ministerial N.ú 86/2023 kona-ba misaun no kompeténsia postu administrativu, hodi habadak burokrasia no hakbesik servisu ba povu.
Antigu deputadu ne’e reforsa katak Governu daudaun iha prosesu intensifikasaun ba implementasaun orsamentu ba tinan fiskál 2026 no preparasaun Programa Administrasaun Anuál (PAA) ba 2027, nune’e presiza prienxe pozisaun hotu-hotu iha nivel autoridade munisipál no postu administrativu.
“Nune’e ita bele iha kapasidade ne’ebé kompletu ein termu rekursu umanu hodi implementa ita-nia PAA ne’ebé sai kumpromisu ba tinan fiskál 2026”, nia dehan.
Iha okaziaun ne’e, nia agradese ba administradór sesante ne’ebé ramata nia mandatu, tanba to’o idade reforma no kontribui ona ba iha dezenvolvimentu Postu Administrativu Lolotoe durante tinan barak.
Nia fiar katak ho lideransa foun, prestasaun servisu públiku iha Postu Administrativu Lolotoe bele sai efetivu liu no fó impaktu pozitivu ba moris komunidade nian.
“Komunikasaun, koordenasaun no serbisu ekipa sai xave ba susesu. Nune’e, hau espera ita boot akresenta konsentrasaun iha serbisu ekipa, iha komunikasaun di’ak no koordenasaun ne’ebé efetiva, bele tulun ita-boot halo serbisu di’ak liután. Husu atu ita-boot hakbesik liután ba komunidade, rona líder komunitáriu sira, nune’e bele tulun ita-boot atu responde diak liután ba ita-nia komunidade”, nia sujere.
Administradór foun Postu Administrativu Lolotoe, Quintino de Jesus, kompromete atu prontu servisu ho responsablidade tuir lei no kompeténsia ne’ebé Governu atribui hodi bele dezembolve postu Lolotoe.
“Ha’u kontinua saida mak administradór sesante halo tiha ona. Ha’u-nia kargu mak foun maibé ha’u la’ós ema foun ba Lolotoe. Ha’u sei serbisu hamutuk ho líder komunitáriu sira, veteranu no intelektuál sira, la haree husi kór, hotu-hotu kontribui atu apoia ha’u, lori Lolotoe ba futuru ida ne’ebé di’ak liu”, nia promete.
Kualidade hanesan Administradór Postu Administrativu, Quintino kompromete sei buka meiu hodi komunika ho autoridade munisipál no Governu sentrál atu aselera projetu reabilitasaun estrada urbana Lolotoe.
“Ha’u prontu sai matan, tilun, ibun no ain ba komunidade Lolotoe, ne’ebé halerik hela estrada iha tempu naruk nia-laran”, nia afirma.
Quintino de Jesus, antes ne’e, asumu kargu hanesan Xefe Gabinete antigu Prezidente Autoridade Munisípiu Bobonaru, Alexandre Pires, no atuál Prezidente Paulo Moniz Maia.
Tuir dadus, postu administrativu Lolotoe iha aldeia 20, suku hitu, ho totál populasaun 7.695, kompostu husi mane 3.813 no feto 3.882. Iha xefe família hamutuk 1.592.
Notísia relevante: Notariadu Bobonaro halo rejistu movél ba idozu-EhD iha Maliana-Cailaco-Bobonaro-Loloto’e
Jornalista: Sergio da Cruz
Editora: Maria Auxiliadora
