BOBONARO, 21 janeiru 2025 (TATOLI)—Diresaun Servisu Konservatóriu Rejistu Notariadu (DSKRN) Munisípiu Bobonaro, iha tinan ne’e, kontinua implementa no hala’o programa rejistu movél hodi prodús Billete Identidade (BI) no Sertidaun RDTL ba Idozu no Ema ho Defisiénsia (EhD) sira iha postu administrativu Maliana, Cailaco, Bobonaro no Loloto’e.
Diretór DSKRN Munisípiu Bobonaro, Marciano Mali Loe, hateten iha tinan kotuk sira konsege implementa ona programa rejistu movél iha postu administrativu Átabae no Balibo ho totál ema-hamutuk 909.
Program ne’e implementa atu hakbesik servisu adminsitrasaun ba baze hodi fasilita idozu no Ema ho Defisiénsia (EhD) sira asesu dukumentu importante sira, tanba kestaun distánsia no saúde la permite sira mai direta trata dukumentu iha edifisíu DSKRN Munisípiu Bobonaro.
Notísia Relevante: Notariadu Bobonaro halo rejistu movel ba idozu no EhD iha Balibo
“Ita-nia servisu ne’e iha tinan ida-ne’e ita sei halo, nafatin kontinua programa ba ema ho defisiénsia no idozu sira hanesan ita halo ona iha postu rua,” Nia informa ba Agência Tatoli iha nia kna’ar fatin, segunda ne’e
Xefe suku Molop, António Maia, hateten nia parte fiar katak programa ne’e sei realiza iha tempu badak, tanba iha populasaun barak mak seidauk asesu dukumentu hanesan Billete Identidade no Sertidaun RDTL ne’e.
“Ami-nia suku ne’e lokaliza iha área rurál tebes, inan-aman sira atu ba trata dukumentu hanesan RDTL ho Billete Identidade maibé araska tebes tanba ho situasaun klima, udan halo bee-mota boot labele hakur liu. Satán, inan-aman sira balun moras, balun sa’e motor tebes mós lahatene, entaun komunidade presiza ekipa DSKRN sira-nia tulun,” nia dehan.
Enkuantu ba atendimentu jerál ba populasaun sira-ne’e hakarak trata dokumentu importan sira-ne’e nafatin sentraliza iha edifisíu DSKRN Bobonaro ne’ebé lokaliza iha Holsa-Maliana.
Notísia Relevante: MJ autoriza IGE inspesiona servisu Notariadu
Jornalista : Sérgio da Cruz
Editór : Cancio Ximenes
