DILI, 20 janeiru 2025 (TATOLI)—Ministériu Justisa (MJ) autoriza ona Inspesaun Jerál Estadu (IGE, sigla portugés), atu halo inspesaun ba servisu Diresaun Jerál Rejistu Notariadu (DGSRN-sigla portugés) liga ba emisaun Pasaporte no Billete Identidade (BI).
“Sira (IGE) halo hela ida-ne’e. Depoizde ha’u haree iha mídia ne’e ha’u lakohi atu halo komentáriu, maibé orientasaun ha’u-nian ba sira mak ne’e, buka hatene ho loloos no rekomenda iha parte ida-ne’ebé mak tama iha Ministériu Justisa kuandu iha irregularidade sira hanesan ne’e bele halo rekomendasaun mai Ministériu Justisa atu ami foti medida,¨ Ministru Justisa, Sergio Hornai ba jornalista sira iha Ministériu Finansa, Ai-tarak Laran, Dili, segunda ne’e.
Hornai hateten, kuandu rezultadu inspesaun ne’ebé mak halo husi IGE deteta katak iha funsionáriu Ministériu Justisa mak fasilita ema iha emisaun Pasaporte no Billete Identidade, MJ deside sei hasai.
Notísia relevante: Reprezentante povu husu MJ hadi’a prestasaun serbisu iha notariadu
“Konserteja se iha problema nusa mak ita labele hola medida. Kuandu iha problema idak-idak tenke asumi responsabilidade. Naran katak tenke iha evidénsia. Labele ho emosaun no labele ho sujetividade,” Hornai realsa.
Antes ne’e, mosu preukupasaun barak iha públiku katak deskonfia akontese irregularidade iha prosesu atendimentu emisaun Pasaporte no Billete Identidade iha Servisu Rejistu Notariadu.
Jornalista: Natalino Costa
Editór: Xisto Freitas da Piedade