Reprezentante povu husu MJ hadi’a prestasaun serbisu iha notariadu
DILI, 14 novembru 2024 (TATOLI)—Durante diskusaun proposta Orsamentu Jerál Estadu (OJE) 2025 ba Ministériu Justisa (MJ), Deputadu sira husu atu hadi’a serbisu prestaun públika iha diresaun rejistadu notariadu.
Deputada PLP, Maria Angelina Sarmento, husu Ministru Justisa ne’ebé responsável másimu ba instituisaun ne’e atu atensaun ba serbisu atendimentu públiku iha diresaun rejistu notariadu hanesan antendimentu pasaporte, billete identidade (BI), rejistu kriminál no seluk tan ne’ebé durante ne’e sempre sai preokupasaun públiku nian iha atendimentu.
“Hakarak husu pedidu esklaresimentu emisaun BI oinsá, tanba to’o agora blanku kontinua uza surat tahan, problema pasaporte ita haree laiha andamentu oinsá, enkuantu ema barak halo ne’ebé ezije hanoin ne’e importante tebes,” Deputada Maria Angelina hato’o iha debate proposta OJE 2025 ba faze espesialidade loron datoluk iha sala plenária PN, kinta ne’e.
Tanba rona informasaun aberta iha mídia sosiál kona-ba broker sira deskonfia halo kobransa ba ema-ne’ebé atu trata hanesan pasaporte entaun ho lalais tebes, no mezmu ema-ne’ebé trata ho normál dalaruma atu foti tempu kle’ur tebes no dalaruma atu rejistu iha sistema online ne’ebé iha sistema ladi’ak hela de’it.
Hanoin serbisu atendimentu públiku ne’e importante tebes, maibé durante ne’e sempre sai prekupasaun tanba iha nesesidade ema barak atu trata dokumentu sira-ne’e hodi uza ba eskola, ba rai-li’ur serbisu no eskola, nune’e presiza tau atensaun hodi hadi’a liután atendimentu públiku.
Deputadu KHUNTO, Antonio Verdiál de Sousa, mós husu tau atensaun tanba durante ne’e sempre iha preokupasaun husi sidadaun sira.
“Ita-nia sidadaun barak tebes liuliu estudante sira ramata ensinu sekundáriu atu trata dokumentu hanesan BI, rejistru kriminál no seluk tan ho kle’ur loos,’’ nia hateten.
Ministru Justisa, Sergio Hornai, hateten prestasaun serbisu kualidade atendimentu públiku ba trata dokumentu sira-ne’e pakote permanente ne’ebé tenke halo no iha governasaun ida-ne’e kontinua, nune’e simu preokupasaun no dezáfiu ho kritika sira hodi orienta prioridade sira sai orientasaun programa kontinua Governu dá-sia nia esforsu halo daudaun.
“Nune’e kompromete atu hasees aan husi burokrásia sira, hodi mellora serbisu atendimentu públiku sira-ne’e. Kona-ba broker ita la fó fatin no laiha toleránsia, sidadaun sira bele hato’o denúnsia,’’ nia hateten
Jornalista : Nelson de Sousa
Editór : Cancio Ximenes
