DILI, 19 Fevereiru 2026 (TATOLI)-Vise-Ministra Negósiu Estranjeiru no Kooperasaun ba Asuntu ASEAN, Milena Rangel, hateten Timor-Leste presiza kumpre tan instrumentu legál hamutuk 48 iha pós-adezaun hodi asegura integrasaun país nian ba Asosiasaun Nasaun Sudeste Aziátiku (ASEAN, sigla inglés).
“Pós-adezaun agora ita tama ona ba prioridade daruak nian. Ita tenke lori tan pelumenus instrumentu legál 48, más inklui ita-nia lei doméstiku, rezolusaun balun tan hodi asegura ita-nia kumprimentu ba kada instrumentu legál sira ne’e, nomós sistema ne’ebé bele asegura integrasaun rejionál”, nia hateten hafoin ramata audiénsia ho Komisaun B iha Parlamentu Nasionál ne’ebé trata Asuntu Negósiu Estranjeiru, Defeza no Seguransa, ohin.
Nune’e, MNEK liuhusi ekipa téknika daudaun prepara hela instrumentu sira ne’e no bainhira finaliza sei lori bá Parlamentu Nasionál hodi halo diskusaun no aprovasaun, enkuantu instrumentu balun hetan de’it aprovasaun iha Konsellu Ministru.
Governante ne’e dehan durante tinan rua presiza trata hodi finaliza instrumentu sira ne’e iha pós-adezaun hodi asegura integrasaun país nian iha organizasaun rejionál ne’e.
“Serbisu sira ita halo hamutuk ho Estadu-membru sira seluk, tanba Estadu-membru balun mós iha hela prosesu integrasaun, la’ós hothotu integradu ona, tanba faze dezenvolvimentu la hanesan”, nia esplika.
Lembra katak, iha loron 26 Outubru 2025, Timor-Leste tama ofisialmente hanesan membru plenu ASEAN ba da-11.
Notísia relevante: Timor-Leste sei lidera Prezidénsia ASEAN iha 2029
Jornalista: Nelson de Sousa
Editora: Maria Auxiliadora
