DILI, 19 Fevereiru 2026 (TATOLI)–Primeiru-Ministru, Kay Rala Xanana Gusmão, hateten Timor-Leste respeita desizaun ne’ebé Myanmar hasai hodi haruka Enkaregadu Negósiu Timor-Leste nian sai husi Myanmar no Timor-Leste laiha kbiit atu halo julgamentu ba kazu sira akontese iha Myanmar no nasaun seluk.
Notísia Relevante: Timor-Leste entrega apoia umanitária ba povu Myanmar
“Sira hasai desizaun, ita respeita, maibé ita mós tenke temi katak buat ne’e justisa nian. Maibé, ita sente katak ita laiha kbiit atu ba buat sira-ne’ebé akontese iha rai seluk,” Xanana hateten hodi responde ba pergunta husi Agência TATOLI iha Palásiu Prezidensiál, Nicolau Lobato, Dili, kinta ne’e.
Desizaun ne’ebé Governu Myanmar foti hodi hasai Timor-Leste nia diplomata iha nasaun referidu, tanba iha fulan rua kotuk ekipa ida husi Myanmar mai hato’o keixa ba Minsitériu Públiku (MP) Timor-Leste nian atu husu Timor-Leste halo julgamentu ba junta militár ne’ebé akontese iha Myanmar no violesaun direitu umanu.
“Espera katak, kazu ne’ebé hatama ona iha Prokuradoria Jerál ne’e arkiva tia de’it. Ha’u atu dehan de’it, ita laiha kompetensia atu julga,” Xanana tenik.
Xefe Governu ne’e esplika, bainhira Timor-Leste foti desizaun hodi la halo julgamentu ba kazu ne’ebé hatama ona ba Minsitériu Públiku Timor-Leste, mak reprezentante Timor-Leste nian iha Myanmar sei hetan salvasaun no la fila mai Timor-Leste no kontinua halo serbisu hanesan baibain.
“Impaktu mak ne’e, mais ita dehan katak ita laiha kbiit atu halo julgamentu sira-ne’e. Entaun, sira rona no sira mós hatene,” Xanana dehan.
Notísia Relevante: Ramos-Horta: Situasaun Myanmar kontinua grave ho violasaun direitu umanu
Jornalista : Hortencio Sanchez
Editór : Cancio Ximenes
