DILI, 20 Fevereiru 2026 (TATOLI)—Ekipa Karketu Dili Football Club (FC) kompromete sei gaña vitória bainhira kontra Assalam FC iha jogu ikus meiu finál Tasa Liga Federasaun Futeból Timor-Leste (FFTL) 2025.
Treinadór Karketu Dili FC, Bernard Teye konsidera jogu volta daruak meiu finál sei nakonu ho emosionál inklui kombate forsa bainhira kontra Assalam maibé Karketu iha ambisaun hakarak gaña vitória hodi kontinua hakat bá finál Tasa Liga FFTL.
“Ami sei manán sira, sei prodús golu tanba ami hakarak bá finál,” Teye hateten iha Estádiu Munisipál Dili, Sesta (20/02/2026).
Notísia relevante: Assalam promete sei marka istória bainhira kontra Karketu Dili FC
Teye relata Karketu prepara ona tátika liuhusi treinu hodi destrui liña defeza Assalam.
Iha fatin hanesan, Kapitaun Ekipa, Olagar Xavier hateten hafoin treinu durante semana-ida ekipa halo ona evaluasaun no hadi’a liña entre jogadór nune’e garantia sei rekolla pontu hodi hakat bá finál Tasa Liga FFTL.
“Ami sei hatudu jogu di’ak hodi rekolla pontu tolu kontra Assalam,” Olagar Xavier promete.
Entretantu, jogu entre Karketu Dili FC kontra Assalam sei realiza iha Estádiu Munisipál Dili, Domingu (22/02/2026) hodi determina destinu ekipa rua ba finál hafoin iha volta dahuluk ramata ho rezultadu impata 1-1.
Jornalista: Natalino Belo
Editór: Xisto Freitas da Piedade
