BOBONARU, 20 Fevereiru 2026 (TATOLI) – Ospitál Referénsia Maliana (HRM, sigla portugés) rejista pasiente ida husi suku Ritabou, postu administrativu Maliana, munisípiu Bobonaru, mate kauza husi moras dengue.
Diretór ezekutivu HRM, José Marçal da Cruz, konfirma pasiente ne’e mate hafoin baixa durante loron sia tanba sofre dengue.
Notísia relevante: Saúde Bobonaru apela ba inan-aman proteje labarik sira husi dengue
“Horseik iha labarik ida mak mate, tanba nia moras ne’e loron tolu iha uma de’it depois mai baixa iha ospitál ho komplikasaun ne’ebé grave ho asites dengue. Ita labele salva, entaun ita-nia oan ne’e iis kotu”, diretór informa ohin.
Nia akresenta katak liu husi ezaminasaun raan iha laboratóriu hahú husi fulan-Janeiru to’o kinta, 19 Fevereiru, HRM deteta pasiente na’in-65 pozitivu dengue no husi numeru ne’e na’in 40-resin mak internadu no ida transfere bá Ospitál Nasionál Guido Valadares, Dili.
“Sira balu alta ona tanba mai ho kazu leve. Na’in-neen mak agora baixa hela, maioria labarik no adultu ida. Sira-nia kondisaun di’ak hela, karik ohin balun alta, entaun menus tan ona. ida mak ami refere bá Dili, maibé to’o agora nia kondisaun di’ak hela iha Ospitál Nasionál”, dehan.
Lembra katak HNGV rejista to’o 09 Fevereiru kazu dengue hamutuk 535, no husi númeru ne’e na’in-hitu mate no 111 mak halo tratamentu.
Atu prevene surtu dengue, Prezidente Autoridade Munisípiu Bobonaru, Paulo Moniz Maia, husu ba komunidade sira halo limpeza iha uma-ninin nian hodi hamate populasaun susuk Aedys Aegepty.
“Ita nia ambiente ne’e tenke moos, hahú kedas iha ita nia uma-laran mai to’o uma-oin no estrada públiku. Se ambiente la moos, moras dengue kontinua mosu. Ambiente moos ona susuk laiha, moras atu afeta ba ita-nia saúde sei menus”, nia apela.
Notísia relevante: SSK halo ona intervensaun ba área risku dengue iha Maliana
Jornalista: Sergio da Cruz
Editora: Maria Auxiliadora
