DILI, 23 Fevereiru 2026 (TATOLI)—Jogu volta daruak entre Karketu Dili Football Club (FC) kontra Assalam paradu kauza husi udan no tuir planu sei kontinua hikas ohin (23/02) hodi deside billete bá finál Tasa Liga Federasaun Futeból Timor-Leste (FFTL) 2025.
Jogu volta daruak iha horisehik (22/02) ne’e hala’o to’o de’it minutu 34 tanba kondisaun inundasaun iha estádiu bainhira akontese udan ho intensidade aas.
Notísia relevante: Karketu promete sei gaña vitória kontra Assalam
Ekipa rua konsege hatudu jogu atrativu hodi rezulta impata 1-1. Assalam FC lidera uluk golu iha minutu 13 liuhusi jogadór Augusto da Costa no Karketu Dili FC konsege enxe golu iha minutu 5 antes jogu pauza.
Ohin, ekipa rua sei kontinua fali jogu iha tuku 18:00 Otl ho totál oras minutu 55 kompostu minutu 15 ba parte dahuluk no parte daruak minutu 45 hodi determina destinu ekipa rua ba finál Tasa Liga FFTL ne’ebé tuir oráriu sei realiza iha Sábadu (28/02/2026).
Entretantu, Karketu Dili FC no Assalam rasik ramata ona jogu volta dahuluk ho rezultadu ikus impata 1-1 ne’ebé hala’o iha Estádiu Munisipál Dili, Domingu (15/02/2026).
Jornalista: Natalino Belo
Editór: Xisto Freitas da Piedade
