BOBONARU, 23 Fevereiru 2026 (TATOLI)-Komunidade husu ba Autoridade Munisípiu Bobonaru atu kria regulamentu ida kona-ba estasiona iha via públika, iha área merkadu Maliana, hodi evita asidente no hamenus engrrafamentu ne’ebé akontese iha fatin ne’e.
Abitante Felicidade de Sousa observa katak, durante ne’e, motorista sira estasiona karreta iha estrada públiku hodi difikulta movimentasaun.
Notísia relevante: SMASA Bobonaru planeia prepara fatin lixu haat iha kapitál Maliana
“Husu Governu oinsá bele kria regra ruma para labele para arbiru, tanba hahú dadeer to’o loraik ne’e karteta truck, carry no angguna sira ne’e forma tuir estrada ninin de’it. Kuandu karreta ruma para fali iha sorin tan, ita ho motór no karreta atu liu de’it mós la di’ak”, nia lamenta ohin.
Motorista Domingos de Jesus dehan durante tinan 20-resin sira estasiona karreta okupa estrada públiku, tanba laiha estasionamentu própriu.
“Se ami labele para iha ne’e, entaun Governu buka fatin luan ida atu karreta sira ne’e para iha ne’ebá. Se la’e hakarak ka lakohi nafatin hanesan ne’e, tanba ami para fali iha dook ne’e dalaruma loron ida labele hetan osan, tanba hanoin ami la halai karreta”, nia dehan.
Ba kestaun ne’e, Prezidente Autoridade Munisípiu Bobonaru, Paulo Moniz Maia, afirma katak autoridade prepara ona sirkulár ida atu regula tranporte públiku no privada iha ne’ebé estasiona iha espasu públiku.
“Karreta ho motór tenke para iha fatin ne’ebé destinadu. Ami marka ona sinal ne’e karreta tenke para duni iha ne’ebá. Sé mak para tuir nia hakarak ne’e sei aplika multa”, dehan.
Tuir observasaun jornalista, movimentasaun transporte maka’as liu iha parte dadeer no loraik.
Notísia relevante: APA Maliana konsensializa komunidade kona-ba limpeza no labele soe lixu arbiru
Jornalista: Sergio da Cruz
Editora: Maria Auxiliadora
