KOVALIMA, 25 Fevereiru 2026 (TATOLI)- Ministru Petróleu no Rekursu Minerál (MPRM), Francisco Monteiro, hamutuk ho Autoridade Kovalima, Miguel Armada Cardoso, sosializa progresu identifikasaun rai no propriedade ba projetu autoestrada sesaun 1,2 no 3 iha Zumalai no Natarbora,Munisípiu Kovalima.
“Ami husu atu komunidade fó apoiu, nune’e bele konstrui autoestrada tinan ne’e,” Ministru Francisco hato’o liuhusi nia diskursu iha Zumalai-Kovalima, ohin.
Iha sosializasaun ne’e, Governante ne’e hatutan atu fó sai ba komunidade sira kona-ba identifikasaun rai, nune’e iha publikasaun no verifikasaun bele halo kompesasaun.
Projetu referida ne’e importante no estratéjiku tanba hanesan fasilidade ba projetu Suai Supplay Base.
Komunidade presiza kontribui
Iha fatin hanesan, Prezidente Autoridade Munisípiu Kovalima, Miguel Armanda Cardoso dehan, autoridade presiza atu hatene modelu kompesasaun ba afetadu sira.
“Ha’u hakarak partilla informasaun ba ha’u ni’an komunidade sira atu kontribui ba dezenvolvimentu, nune’e dezenvolvimentu iha munisípiu bele la’o ho di’ak labele halo intervensaun husi joven,veteranu no entidade sira seluk,” Prezidente Autoridade Munisípiu Kovalima ne’e hato’o.
Atu halo Dezenvolvimentu iha munisípiu presiza kumpre lei núneru 36/2014 kona-bá folin ai-horis no rai privadu sira.
Notísia relevante: SETP halo levantamentu dadus ba komunidade afetadu autoestrada la’o normál
Jornalista: Celestina Teles
Editór:Florencio Miranda Ximenes
