KOVALIMA, 25 Fevereiru 2026 (TATOLI)– Prezidente Autoridade Kovalima, Miguel Armada Cardoso, kuarta ne’e hamutuk Diretór Servisu Edukasaun Munisipál Kovalima lansa atu implementa Programa Merenda eskolár (PME), iha Eskola Bázika Centrál Sandalo.
Biban ne’e, PAM Kovalima, Miguel Armada Cardoso, husu ba fornesedór sira hodi implementa programa merenda eskolár tuir mata-dalan no liuliu utiliza ai-han lokál ho pursentu 75%.
“Implementasaun programa ne’e iha eskola nian loron efetivu durante loron 148 tanba fornesedor sira labele hamosu manipulasaun no konspirasaun se la tuir mata-dalan mak sei prosesa,” PAM Kovalima ne’e dehan iha lansamentu iha EBC Sandalo-Suai,ohin.
Lidér Munisípiu ne’e mós fó hanoin ba fornesedór kona-ba osan ba PME ho kuidadu no fó ai-han ba alunu sira tuir menu ho nutrisaun di’ak.
Iha biban hanesan, Diretóra Servisu Edukasaun Munisipál Kovalima, Elda de Fátima, reforsa katak implementasaun PME foin mak hahú implementa, maibé la fó impaktu ba loron efetivu PME.
“Nune’e, hueu ba jerente ba programa merenda eskolár atu ezekuta tuir mata-dalan hodi alunu sira konsumu ai-han nutritivu,” nia sujere.
Direjente Edukasaun mós promete sei fasilita formasaun ba ekipa implementadór PME hanesan ba jerente no fornesedór sira.
Tuir dadus orsamentu PME 2026 ba Kovalima hamutuk $1.223.620 no implementa iha eskola 139.
Notísia relevante:Programa merenda eskolár iha Kovalima maiória uza produtu importadu
Jornalista: Celestina Teles
Editór:Florencio Miranda Ximenes
