DILI, 26 Fevereiru 2026 (TATOL)-Governadór Banku Sentrál Timor-Leste (BCTL, sigla portugés), Helder Lopes, hateten proposta Lei Promosaun no Esportasaun sei fó benefísiu ba ekonomia país nian, tanba lei ne’e iha razaun fundamental tolu, liuliu atu fasilita no regula atividade esportasaun.
“Bele fó benefísiu barak ba ita-nia ekonomia, tanba agora iha problema sistemátika rua ne’ebé eziste iha ita-nia ekonomia, ne’ebé ita presiza nu’udar Estadu hadi’a”, nia hateten hafoin halo audiénsia públika kona-ba proposta lei ne’e ho Komisaun D ne’ebé trata Asuntu Ekonomia no Dezenvolvimentu, iha Parlamentu Nasionál, ohin.
Razaun dahuluk mak país kontinua dependénsia ba Fundu Mina-rai, tanba reseita doméstika sei ki’ik no defísit komersiál esternu sei boot, tanba importasaun sasán barak liu duké esportasaun.
“Iha lei ne’e oinsá Governu fasilita no regula atividade komersiál sira hodi orienta ba esportasaun, nune’e promove esportasaun no hamenus défisit komersiál esternu iha futuru”, nia dehan .
Razaun seluk mak apoia lei ne’e tanba iha artigu 13 hatete esportadór iha liberdade atu halo transferénsia kapitál osan ba sira-nia rai ho livremente, maibé tenke la’o tuir regra BCTL nian.
“Ida-ne’e importante atu kontrola. Iha fundamentál rua, transferénsia kapitál ba rai-li’ur labele afeta ita-nia atividade ekonómika iha rai-laran, no evita brankeamentu kapitál no finansiamentu terrorizmu”, afirma.
Razaun datoluk mak lei ne’e atu armoniza kuadru legál ho padraun Asosiasaun Nasaun Sudeste Aziátiku (ASEAN, sigla inglés) nian nu’udar país membru atu halo komérsiu.
Nia rekomenda ba Parlamentu atu aselera diskusaun no aprovasaun ba lei ne’e hodi fasilita atividade esportasaun.
Tuir dadus 2025, país ne’e halo importasaun ba produtu hamutuk millaun $800-resin no halo komparasaun iha tinan kotuk Governu gasta pur volta billaun $1,8, nune’e kuaze metade husi osan ne’e sai hotu ba rai-li’ur.
“Lei ne’e mai pelumenus fó konfiansa legál katak, empreza sira fó legál ba sira hodi halo investimentu no prodús iha rai-laran depois halo esportasaun, nune’e osan ne’ebé ita hasai sosa sasán iha rai-li’ur pelumenus bele hamenus”, nia realsa.
Notísia relevante: Lei Promosaun Esportasaun konstitui pasu estratéjiku ba dezenvolvimentu ekonómiku
Jornalista: Nelson de Sousa
Editora: Maria Auxiliadora
