OEKUSI, 27 Fevereiru 2026 (TATOLI) –Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Edukasaun no Solidariedade Sosiál, transfere ona estudante na’in-50 iha Eskola Bázika Filiál (EBF) Lamasin siklu 1 ba fatin seguru, tanba ameasadu husi erosaun, no sei rezolve ho fundu emerjénsia hodi harii edifísiu provizóriu.
Diretór Diresaun Rejionál Edukasaun no Solidariedade Sosiál, Vincêncio Cono, promete sei hato’o pedidu ba Prezidente Autoridade RAEOA hodi konstrui edifísiu provizóriu atu garante prosesu ensinu aprendizajén ba estudante sira.
“EBF siklu 1 Lamasin, ameasadu kedas iha tinan kotuk 2025 akontese erosaun iha arredór eskola, no hatudu sinál balun iha eskola oin mós rai-halai, entaun ba futuru fó ameasa ba edifísiu eskola ne’e bele destroi inklui uma-kain ida-ne’ebé hela besik eskola,” Vincêncio Cono informa ba Ajénsia Tatoli,I.P iha Oekusi, ohin.
Ezekutivu ne’e, konforma, katak iha semana kotuk akontese tan, nune’e parte edukasaun haree ona no tau iha planu, tanba anin sobu mós sala refeisaun ka koziña eskola nian, no erosaun iha eskola ne’e mós aumenta no besik ona morru no saladeaula sira mós komesa nakfera.
Tanba ne’e iha semana kotuk, hetan kedas orientasaun husi Prezidente Autoridade, atu ekipa tuun urjente, daudaun ne’e parte edukasaun evakua urjente ba estudante sira ba iha fatin foun.
“Ami nota, obrigatóriu tenke haree edifísiu emerjénsia no sala refeisaun, no estudante sira tenke hamamuk ona eskola referida tanba ameasadu, tanba erosaun ne’e haleu ona eskola ne’ebé la seguru ona atu hala’o atividade aprendizajén. Ita tenke rezolve urjénsia lai, ami sei esforsa maka’as hodi informa ba Prezidente Autoridade atu hatuun despaixu, sei bele renponde fundu emejénsia, nune’e bele iha tinan ne’e, mezmu la tama ba planu orsamentu tinan ne’e,” nia hateten.
Notísia relevante:Edifísiu EBF Lamasin iha Nítibe hetan ameasadu husi erosaun
Xefe Aldeia Lamasin, Domingo Seco, hamutuk ho Koordenadór EBF Siklu 1 Lamasin, Lazaro Bacun, identifika ona fatin no entrega ona rai ho medida metru 75 x metru 125 ba edukasaun atu harii edifísiu provizóriu, nune’e bele kontinau hikas ensinu aprendizajen.
“Ami hamutuk ho lia-na’in sira, komunidade, koordenadór eskola inklui profesór sira identifika ona fatin ida, no oferese ona ba Governu liuhusi Diresaun Regionál Edukasaun no Solidariedade Sosiál, iha tempu badak ita bele hari’i ona saladeaula ho provizóriu, agora labarik sira moós evakua ona, labele kontinua eskola iha fatin ne’e ameasadu husi Erosaun,” xefe aldeia Lamasin dehan.
Autoridade Lokál ne’e informa katak, rai-ne’ebe oferese ba Governu liuhusi Diresaun Regionál Edukasaun ho nia estutu rai abandonadu, desde bei-ala sira nia tempu, husik hela, nune’e komunidade no autoridade suku deside oferese ba Governu.
“Ami la ezjijénsia ba Governu, importante ami-nia oan sira asesu ba edukasaun ne’ebe besik, no seguru, tanba fatin daudaun ne’e ameasadu husi erosaun ka rai-halai,” nia promete.
Notísia relevante:Agrikultura Oekusi apoia ai-oan 300 ba EBF Lamasin
Entretantu, totál estudante iha Ensinu Báziku Filiál (EBF) Siklu 1 Lamasin hamutuk na’in-50 kompostu husi 1⁰ ano to’o 4⁰ ano, ho profesór hamutuk na’in-tolu ho totál populasaun iha aldeia Lamasin hamutuk 466 husi uma-kain 111.
Notísia relevante:
Jornalista: Abílio Elo Nini
Editór: Rafael Ximenes de A. Belo
