DILI, 27 Fevereiru 2026 (TATOLI) – Parlamentu Nasionál husu ba Governu atu kria tan dekretu-lei ida hodi regula marka pestisida hotu ne’ebé utiliza iha Timor-Leste.
Prezidente Komisaun D, ne’ebé Trata Asuntu Ekonomia no Dezenvolvimentu, Ricardo Baptista, dehan Komisaun finaliza ona diskusaun ba proposta lei númeru 21/VI(2a)-Pestisida iha faze espesialidade. Tanba ne’e, submete ona relatóriu no pareser ba meza Parlamentu hodi bele ajenda ba faze tuirmai iha diskusaun no votasaun finál globál iha plenária.
Kestiona kona-ba proposta lei ne’e atu regula marka tipu pestisida saida de’it, nia hateten ida ne’e sei regula husi dekretu-lei tanba iha proposta lei ne’e ko’alia liu oinsá atu regula nia prosesu, produsaun, transportasaun, armazenamentu, merkadu no utilizasaun.
“Ko’alia kona-ba marka espesífiku ne’e sei iha dekretu-lei ne’ebé parte Governu mak sei halo”, nia hateten.
Durante diskusaun espesialidade, deputadu sira aprezenta proposta alterasaun hamutuk 24 hodi mellora artigu sira, nune’e iha implementasaun bele la’o ho efisiénsia iha futuru.
Proposta lei ne’e aprezenta husi Ministériu Agrikultura, Pekuária, Peska no Floresta (MAPPF) ho objetivu atu regula, iha territóriu nasionál tomak, lisensiamentu, importasaun no esportasaun, produsaun, fa’an no distribuisaun, utilizasaun, embalajen no soe pestisida sira, inklui pestisida agríkola sira, iha faze hotuhotu husi sira-nia siklu moris.
Notísia relevante: https://tatoli.tl/2026/02/02/parlamentu-aprova-proposta-lei-pestisida-iha-jeneralidade/
Jornalista: Nelson de Sousa
Editora: Maria Auxiliadora
