DILI, 28 Fevereiru 2026 (TATOLI)–Emanuel FC marka istória hodi sai kampiaun Tasa Liga Federasaun Futeból Timor-Leste edisaun dahuluk 2025.
Vitória referida gaña hanoin elementu treinadór Emílio Ribeiro “Arí” manán ekipa forte Karketu Dili FC iha finál ho skor 1-0 ne’ebé hala’o iha Estádiu Munisipál Dili, Sábadu ne’e.
Emanuel FC domina jogu, tan ne’e iha minutu 45+4 jogadór Vincer Kojo Nortey lori vitória antes parte dahuluk termina.
Notísia relevante: Emanuel FC sai obstákulu ba Karketu iha Finál Tasa Liga FFTL?
Fretiliano Santos de Jesus hamutuk ho kolega hatudu mentál jogu ne’ebé kompetetivu hasoru Karketu Dili FC, maski ekipa Matak Malirin domina husi jogadór estranjeiru no iha treinadór estranjeiru no mós antes ne’e susesu sai kampiaun iha primeira divizaun Liga Futeból Timor-Leste (LFTL).
Karketu Dili FC rasik mezmu lakon golu iha parte dahuluk maibé nafatin hatudu kontra-atake, maski nune’e guarda rede Emanuel FC hatudu perfománsia ne’ebé di’ak hodi salva ameasa ne’ebé Karketu Dili lansa iha parte daruak minutu ikus estra nian.
Ikus, elementu Bernard Teye tenke rende no hakruuk ba Emanuel nia vitória.
Emanuel FC rasik antes sai kampiaun, nu’udár vensedór husi Grupu A no manán Portu Taibessi ho agregadu golu 2-1 iha meiu finál iha-ne’ebé volta dahuluk impata 1-1 no volta daruak manán ho skor 1-0.
Jornalista: Natalino Belo
Editór: Xisto Freitas da Piedade
