DILI, 28 Fevereiru 2026 (TATOLI)—Ekipa téknika sira husi Servisu Edukasaun Munisípiu Ainaru halo ona levantamentu dadus ba Eskola Klase Paralelu Dugau iha Aileu ne’ebé falta infraestrutura eskolár hodi halo estudante sira tuur iha rai, nune’e bele hato’o ba Ministériu Edukasaun (ME) atubele tau prioridade.
“Ami-nia tékniku sira bá sukat ona rai, maibé eskola ne’e estatutu rai seidauk loos, tanba ne’e ami presiza komunidade no Autoridade lokál sira atu hato’o deklarasaun mai Edukasaun Munisipál. Nune’e, bainhira tama ba konstrusaun labele mosu dezentendimentu. Tanba iha referénsia balun ita tau osan atu ba konstrui komunidade la fó rai,” Diretór Servisu Edukasaun Munisípiu Ainaru, Patrício da Costa Magno, hato’o ba Jornalista sira iha Zinájiu Dili, Sábadu ne’e.
Nia rekoñese, estudante iha eskola ne’e tuur iha rai no kondisaun eskola la favorável ba estudante sira atu apreende.
Notísia relevante : ISC-DIT-IoB mak loke ona klase paralelu iha munisípiu sira
Klase Paralelu ne’e husi Paralelu Ensinu Báziku Martinho de Araujo Maununu no eskola ne’e rasik harii iha tinan 2018 husi komunidade, maibé la’ós de’it klase paralelu maibé inklui mós Pre-Eskolár ida iha ne’ebá.
Diretór katak, kona-ba kondisaun eskola, la’ós Klase Paralelu Dugau de’it mak feitu ho kalen maibé iha mós eskola seluk mak ho didin no kalen.
“Loos duni, realidade ita haree estudante sira tur iha rai nomós kondisaun edifísiu eskola ne’e rasik la favorável ba estudante atu apreende, tanba ne’e Edukasaun Munisípiu esforsu hela atu rezolve problema ida-ne’e.
Servisu Edukasaun Munisipál indentifika mós Ensinu Báziku Sentrál ne’ebé ho kondisaun grave.
“Eskola rua mak ami identifika ho kondisaun ladi’ak, hanesan Ensinu Báziku Sentrál Mota-Ulun nomós Klase Paralelu Dugau. Ita sei ko’alia ho ministériu oinsá bele ajuda sira-nia kondisaun, maibé ita tau ona ba planu 2027,” nia katak.
Kona-ba orsamentu kontrusaun sei haree ba kondisaun rai, karik rai tetuk orsamentu tun maibé se rai la tetuk orsamentu sae.
“Tuir ami-nia esperiénsia, bainhira Ministériu Edukasaun konstrui saladeaula tolu inklui eskritóriu, kuziña merenda eskolár no toilet nia orsamentu hamutuk $180.000,” nia dehan.
Eskola Klase Paralelu Dugau ho totál estudante hamutuk 102, kompostu husi Pre-Eskolár 36, Ensinu Báziku 1⁰ to’o 6⁰ anu 6 ho nia totál profesór na’in-neen.
Jornalista : Osória Marques
Editora : Julia Chatarina
