DILI, 01 Marsu 2026 (TATOLI) – Televizaun estatál iranianu, Ahad, konfirma iha loron-domingu katak Líder Supremu Ali Khamenei mate iha atake israelita no norte-amerikanu.
Antes ne’e, mídia izraelita no Prezidente norte-amerikanu, Donald Trump, afirma katak Khamenei mate ona.
Tuir relatóriu, Ayatollah Ali Khamenei lidera ona nasaun ne’ebé maka serbisu kleur liu iha Médiu Oriente. Nia sai hanesan líder supremu Iraun nian iha tinan 1989 hafoin sai hanesan prezidente hosi tinan 1981 to’o 1989.
Estadus Unida Amérika ho Izraél lansa ona atake sira iha loron-sábadu hasoru alvu oioin iha Iraun, inklui Teeraun.
Agresaun militár ida-ne’e hosi EUA no nia aliadu prinsipál sira iha Médiu Oriente la’ós de’it kauza estragu sira maibé mós vítima sivíl sira. Iraun hafoin ne’e halo retaliasaun hodi lansa atake sira ho misil vingansa nian hasoru teritóriu israelita, no mós hasoru alvu militár norte-amerikanu sira iha Médiu Oriente.
Prezidente Estadu Unida Amérika, Donald Trump, hatete iha loron-sábadu, 28 Fevereiru katak Líder Supremu Iraun nian, Ayatollah Ali Khamenei, mate ona, hafoin Izraél ho EUA lansa atake ida ho ho objetivu atu hamonu repúblika islámika.
Estrada públiku iha Teeraun nian hetan populasaun hafoin informasaun sira kona-ba mate hosi Khamenei, líder prinsipál Iraun nian dezde 1989, bainhira suar metan sira namlele iha distritu Pasteur nian ne’ebé nia baibain hela, hatete hosi sasin sira ba AFP.
“Khamenei, ema ida ne’ebé aat liu iha istória, mate ona”, Trump hatete iha nia rede Sosiál Truth.
“Ida-ne’e maka oportunidade boot liu ba povu iranianu atu foti fali sira-nia nasaun,” nia hatutan.
Iha domingu dadeer ne’e, Reuters fó-sai tan katak, Khamenei nia oan-feto, bei-oan, feto-foun no mane-foun mate iha atake sira, fó sai hosi imprensa estatál iranianu.
Maske nune’e, Teeraun seidauk konfirma Khamenei nia mate.
Primeiru-ministru israelita, Benjamin Netanyahu, antes ne’e hatete katak iha “sinál barak katak tiranu ne’e la moris ona”.
Dirije ba povu Iraun nian, inimigu prinsipál Israel no EUA nian dezde revolusaun islámika 1979, Netanyahu hatete: “Ida-ne’e maka imi-nia tempu atu halibur forsa sira, hodi hamonu rejime no hodi asegura imi-nia futuru”.
Atake sira halo Teeraun tiru misil sira iha Médiu Oriente, ho kanek sira no pelumenus mate ida ne’ebé maka relata iha esplozaun sira ne’ebé maka halo nakdoko sidade sira iha monarkia árabe sira Golfu nian.
Autoridade iranianu sira husu ba rezidente sira atu evakua kapitál, sidade ida ho ema millaun 10, enkuantu sosiedade Crescent Vermellu nasaun nian hatete katak pelumenus ema na’in 201 mate ona iha atake sira no liu na’in 700 hetan kanek.
Judisiáriu iranianu hatete katak atake ida ne’ebé akontese iha eskola ida iha súl hamate ema na’in 108, maski AFP la konsege asesu ba fatin ne’e hodi verifika númeru vítima sira ka sirkunstánsia sira ne’ebé haleu insidente ne’e.
Emiradu Árabe Unida relata ema sivíl ida mate no hetan estragu hosi misil sira iha Dubai no Abu Dhabi, tanba esplozaun sira hosi salvu vingansa Teeraun nian no defeza aérea sira ne’ebé interseta nia mós iha Israel, Arábia Saudita, Bahrein, Katar, Jordánia no Kuwait.
Ministru Negósiu Estranjeiru Iraun nian, Abbas Araghchi, antes ne’e hatete ona ba NBC News katak Khamenei moris hela “tuir ha’u hatene”, hodi hatutan katak “funsionáriu aas sira hotu sei moris hela”.
Husu mós kona-ba Khamenei nia saúde, porta-vós hosi Ministériu Negósiu Estranjeiru, Esmail Baqaei, hatete ba BBC katak nia “la iha situasaun ida hodi konfirma buat ruma”, maibé “sistema tomak, nasaun tomak konsentra iha defeza (ita nia) integridade nasional”.
Hanesan sinál ida katak kombate sei dook atu hotu, Netanyahu hatete katak alvu sira “rihun” sei hetan iha loron hirak tuirmai, enkuantu responsável aas seguransa Iraun nian promete represaun maka’as ida.
Ezérsitu israelita hatete katak Ali Shamkhani, asesór ida hosi Khamenei, no xefe hosi Guarda Revolusionáriu Iraun nian ne’ebé maka’as, jenerál Mohammad Pakpour, sira na’in-rua mate.
Ali Larijani, Xefe Konsellu Supremu Seguransa Nasionál Iraun nian, hatete: “Soldadu barani sira no nasaun boot Iraun nian sei hanorin lisaun ida ne’ebé labele haluha ba opresór internasionál sira.”
Rezidente sira Teeraun nian hala’o hela sira-nia negósiu baibain bainhira greve sira hahú. Forsa seguransa sira inunda lalais dalan sira, loja sira taka no ema la’o ain uitoan de’it maka risku atu sai, observa hosi jornalista ida hosi AFP.
“Ha’u haree ho matan rasik misil Tomahawk rua ne’ebé semo orizontál ba alvu sira”, hatete hosi funsionáriu ida hosi eskritóriu Teeraun nian ba AFP antes komunikasaun no asesu ba internet kotu.
Crescent Vermelho hatete katak provínsia 24 hosi provínsia 31 Iraun nian hetan afetadu hosi atake sira.
Iha Israel tomak, sidade nia dalan sira sai mamuk tanba rezidente sira subar iha abrigu sira, enkuantu esplozaun sira hosi misil iranianu sira ne’ebé hetan intersepsaun iha leten.
Servisu emerjénsia sira relata katak ema na’in-rua hetan kanek.
Notísia relevante: Trump: EUA hahú halo operasaun boot hasoru Iraun
