VIKEKE, 03 Marsu 2026 (TATOLI)–Responsavel empreza Similie, João Bosco, hateten sira instala ona plataforma sistema alerta sedu iha Aldeia Uma-Boot, Suku Luka, Postu Administrativu Vikeke Vila, Munisípiu Vikeke.
“Instalasaun ne’e ami hetan fiar husi Care International iha Timor-Leste hodi instala plataform alerta sedu. Sistema ne’e sei fó dadus reál kona-ba klimátika nian hanesan intensidade udan no anin ne’ebé ita bele manda liuhusi email no ami mós sei ko’alia Timor Telekom hodi alerta liuhusi mensajen ba ita-nia komunidade,” João Bosco dehan iha lansamentu sistema plataform iha Aldeia Uma-Boot, Tersa ne’e.
João esplika sistema plataforma ne’e automátika, kuandu mosu klima (udan boot) sei alerta ba komunidade ne’ebé instala ona iha telemovel laran.
Iha fatin hanesan, Prezidente Autoridade Protesaun Sivíl (APC-sigla portugeza), Jesuíno dos Reis de Matos Carvalho, hato’o agradesimentu ba doadór sira hanesan Care International, Similie no Fundasaun Knua Haberan Komunidade (F-KHK) ninia apoiu hodi instala sistema plataforma hodi fasilita dadus ba APC atubele responde ba situasaun dezastre.
“Ha’u husu ba Komandante Operasaun Protesaun Sivil Munisípiu Vikeke atu kolabora ho komunidade Aldeia Uma-Boot atu kuidadu no tau-matan ba sistema ida-ne’e,” nia hato’o.
Plataforma sistema alerta sedu nia maneira utiliza kompostu husi sukat nivel bee ka mota, intensidade udan-been, anin no temperatura rai no fornesimentu dadus.
Iha lansamentu ne’e, Koordenadór Nasionál Projetu Dezastre Prontu-Australian Humanitarian Partnership (AHP), Maqsood Kabir, husu ba komunidade no APC atu kontinua tau-matan no kuidadu sistema ne’e atubele uza ba tempu naruk.
Partisipa iha lansamentu sistema alerta sedu kompostu husi Diretór GREK, Cesário da Silva Marques, Diretór DNER, Jaime Gonçalves, Komandante Operasaun Protesaun Sivíl Munisípiu Vikeke, Cirílio Gomes, Komandante Korpu Bombeiru Munisípiu Vikeke, Amaro da Silva, Jerente Projetu Dezastre Prontu, Serpa Pinto, autoridade lokál inklui ekipa F-KHK no komunidade.
Jornalista: Vitorino Lopes da Costa
Editór: Xisto Freitas da Piedade
