BEIJING, 04 Marsu 2026 (TATOLI) – Ohin, iha Beijing, Kapitál Xina, Asembleia Popular Nasionál 14º (NPC), nu’udar Órgaun Altu Lejislativa hahú sesaun anuál, eventu importante ne’ebé mak gaña atensaun globál fokuliu ba Planu Foun husi nasaun segunda maior poder ekonomia iha mundu.
Prezidente Xineza, Xi Jinping hamutuk ho líder polítiku importante no lejisladór rihun rua resin mak marka prezensa iha seremónia abertura Sesaun Anuál Asembleia Popular Nasionál Xineza.
Iha loron dahuluk, lejisladór sira analiza no ezamina esbosu 15º Planu Quinquenal (2026–2030) konsentra ba dezenvolvimentu ekonómiku nasionál no sosiál.
Iha okaziaun ne’e, lejisladór sira ezamina proposta no planu anuál dezenvolvimentu ekonómiku nasionál no sosiál ba 2026. Iha biban hanesan, lejisladór sira mós avalia relatóriu ezekusaun orsamentu Estadu 2025 no analiza projetu orsamentu ba 2026.
Iha ninia intervensaun, Li Hongzhong, vise-prezidente Komite Permanente Asembleia Popular Nasionál, aprezenta esplikasaun kona-ba asuntu kódigu ambientál foun, esbosu lei foun ne’ebé mak sei foku ba promosaun unidade entre grupu étniku oi-oin no lori progresu ba grupu hirak. Nia mós fó esplikasaun kona-ba planu dezenvolvimentu nasionál.
Iha Kuarta (04/03), Horseik, Komité Nasionál Konferénsia Konsultiva Polítika Povu Xinés (CPPCC), nu’udar “Órgaun Prinsipál Konsultivu Polítiku Xina mós realiza abertura sesaun anuál.
Marka prezensa iha abertura ne’e inklui Prezidente Xi Jinping, hamutuk ho líder polítiku importante seluk hodi diskute planu no prioridade ba tinan lima oin mai.
Diskusaun ba Planu Tinan Lima sai núdar roteiru estratéjiku – la’ós de’it sai hanesan lista ida maibé, sai nu’udar kuadru orientadór ne’ebé sei define mekanizmu oinsá mak nasaun ne’e bele implementa ninia prioridade dezenvolvimentu.
Durante sesaun abertura ne’ebé mak realiza iha Salaun-boot Povu Xinés, membru CPPCC analiza no aprova ajenda ne’ebé mak sei diskute husi loron 4 to 11 Marsu 2026.
Entre proposta 5,992 ne’ebé tama ona iha meza CPPCC, proposta hamutuk 5,066 mak simu ona aseitasaun ba diskusaun iha loron hirak tuirmai.
SESAUN ANUAL NPC AND CPPCC 2026 (NPC & CPPCC ANUAL SESSION 2026)
Kada tinan Xina realiza Sesaun boot rua hanaran Sesaun Anuál ba “Órgaun Prinsipál Konsultivu Polítiku Xina” no mós Sesaun Anuál ba “Asembleia Popular Nasionál Xina” (NPC and CPPCC Anual Sessions 2026).
Husi sesaun boot rua ne’e, iha tinan ne’e, Xina mai ho vizaun ida atu aselera dezenvolvimentu ho kualidade aas no mantein ninia dinamizmu reforma iha senáriu globál ne’ebé mak sempre hasoru mudansa konstante.
Nu’udar nasaun maior ekonomia da-ruak iha mundu, sesaun boot rua ne’e marka momentu espesiál ba Órgaun Konsultivu Polítiku no Lejisladór sira hodi revee progresu ne’ebé mak atinje ona hodi sai nu’udar estratéjia importante atu guia prosesu dezenvolvimentu nasaun ne’e nian iha futuru.
Asuntu importante ne’ebé mak sei foku durante diskusaun iha Sesaun Boot Rua ne’e mak hanesan, Siklu Planeamentu Foun ne’ebé mak foku liu ba define prioridade sira hodi guia polítika fiskál, transformasaun industriál no progresu sosiál to’o 2030.
Portantu, durante sesaun boot rua ne’e, diskusaun mós sei foku ba meta kresimentu ekonómiku. Ho nune’e, kestaun kresimentu Produtu Internu Brutu(PBI) Xina iha 2026 sei sai asuntu importante iha diskusaun sira.
Rekorda katak, iha 2025, kresimentu ekonómiku Xina atinji 5% hodi lori nasaun ne’e sai núudar motor estável no konfiável ba kresimentu ekonómiku mundiál.
Indústria ba Futuru sai mós tópiku importante durante enkontru, iha ne’ebé diskusaun sira sei foku ba hatuur diresaun estratéjika no estabelese planu sira ba indústria Xina nian iha futuru, inklui teknolojia kuántika, biomanufatura, idrojéniu no enerjia fuzaun nuklear, interfaze sérebru-komputadór, intelijénsia artifisiál inkorporada no komunikasaun telemóvel 6G.
Jornalista: Filomeno Martins
Editor: Rafael Ximenes de A. Belo
