DILI, 04 Marsu 2026 (TATOLI)—Prezidente Autoridade Munisípiu Dili, Francisco do Santos, klarifika kaixote lixu ne’ebé tau iha Tibar ne’e la’ós atu so’e maibé sei utiliza no rezerba ba loron aban.
Notísia Relevante: Ema deskoñesidu sunu kaixote lixu haat iha Comoro
Nia hatutan, daudaun ne’e kaixote lixu tau iha ne’e iha Tibar tanba fatin sira iha kapitál Dili sei iha prosesu alargamentu estrada, maibé hafoin alargamentu hotu no estrada sira hahú di’ak ona mak sei distribui kaixote lixu sira-ne’e ba fatin públiku ne’ebé nesesária.
“Totál kaixote lixu ne’ebé iha hamutuk 1.122 maibé distribui ona hamutuk 700-resin, entaun restu ne’e sei rai rezerva ba prosesu alargamentu estrada hotu foin distribui. La signifika katak ita la uza maibé ne’e ita sei uza. Se lae, ita distribui agora aban bainrua estrada di’ak ona ita atu foti fali iha ne’ebé,” Prezidente Autoridade Munisípiu Dili ne’e informa ba jornalista sira iha nia kna’ar fatin, ohin.
Kaixote Lixu sira-ne’e labele fó hotu ba komunidade tanba sei la to’o, tanba komunidade Dili laran ne’e la’ós uitoan maibé barak, entaun sei haree fatin sira-ne’ebé mak nesesáriu atu tau kaixote lixu sira-ne’e.
“Kaixote lixu ne’ebé ita rai iha Tibar ne’e mós sei la hetan estragu tanba nia ho forma masa entaun la aat arbiru bainhira kona loromatan. Aleinde ne’e, ekipa jestaun sira iha Tibar mós halo seguransa ba fatin refere, entaun ita garante fasilidade sira-ne’e sei lahetan estraga husi kualker ameasa,” nia esplika.
Tanba ne’e, nia nafatin apela ba komunidade atu iha konsiénsia ba soe lixu, labele soe foer arbiru tanba fasilidade hotu Governu prepara ona no soe lixu tenke tuir oráriu hahú husi tuku 18h00 lorokaik to’o tuku 06h00 dadeersan.
Nia hateten, lixu sira-ne’ebé namkari ne’e komunidade soe lixu fora husi oráriu, entaun tenke pontualidade atu kamioneta saneamentu sira bele tula lixu tuir oras.
Entretantu, daudaun ne’e totál kamioneta saneamentu manuál ne’ebé halo operasaun iha Dili laran hamutuk 50 no kamioneta rezerva raut lixu fora husi oráriu hamutuk rua no kamioneta modernu operasionál hamutuk 10.
Notísia Relevante: China Harbour koloka ona kaixote lixu 1022 iha kapitál Dili
Jornalista : Alexandra da Cota
Editór : Cancio Ximenes
