DILI, 08 setembru 2024 (TATOLI)–Xefe Departamentu Servisu Água no Saneamentu iha Autoridade Munisipál Dili (AMD), Domingos dos Santos Soariano, informa ema deskoñesidu sunu kaixote lixu hamutuk haat iha suku Comoro, iha segunda (07 outubru 2024) lorokraik.
Notísia Relevante: Governu lansa kompetisaun “Dili Hamurak” komemora “Dili Day” ba da-255
“Ita hakarak buat di’ak ba komunidade maibé ema ba sunu kaixote lixu sira-ne’e, ita atu halo sa’ida. Ema sunu iha Kampung Baru iha klinika Comoro nia oin ne’e. Ema sunu horisehik kalan. Ema sunu kaixote lixu hamutuk haat,” Xefe Departamentu Servisu Água no Saneamentu iha Autoridade Munisipál Dili (AMD), Domingos dos Santos Soariano, hateten ba Agência TATOLI liuhusi programa “Entrevista Eskluziva” ho tema “Jestaun Lixu iha Kapitál Dili”, iha estúdiu Farol, tersa ne’e.
Nia dehan, AMD seidauk hetan ka identifika autór ruma ne’ebé sunu kaixote lixu sira-ne’e iha fatin ne’ebá no seidauk hatene kauza sunu kaixote lixu ne’e tanba saida.
Antes ne’e, nia dehan, iha suku Bebonuk nian ne’e mós komunidade sira sunu tiha kaixote lixu ne’ebé AMD no empreza China Harbour koloka iha fatin lixu (lixeira) hodi bele fasilita komuniddae so’e lixu iha laran.
“Ita seidauk hatene autór sunu ne’e, komunidade mak hakarak sunu ka ema soe sigaru latun mak ahi han ka oinsá. Ita komunika ona ho autoridade lokal no seguransa, se iha informasaun ba iha autor ne’e karik bele detein,” nia dehan.
Notísia Relevante: Komemora “Dili Day”, suku 31 sei partisipa kompetisaun suku limpu
Antes ne’e, Jestor Empreza China Harbour Timor, Lda, Jonio de Anunsiação, hateten empreza koloka ona kaixote lixu hamutuk 1022 ho medidade 1.1 kubiku iha pontu ka fatin sira iha kapital atu populasaun sira bele so’e lixu iha laran no ajuda karreta modernu raut lixu bele ba foti no fakar ba karreta laran
Xefe departamentu mós hateten, AMD distribui ona sirkular husi Prezidente Autoridade Munisipal ba loja no xefe suku sira hodi so’e lixu iha lixeiru no sensibilzia autoridade lokal sira atu fahe informasaun ba komunidade.
“Husu ba komunidade, foer ne’ebé prodús ne’e soe ba iha kaixote lixu nia laran ka lixeiru besik imi-nia aldeia, atu ekipa saneamentu bele foti ho di’ak. Labele soe lixu arbiru iha baleta, estrada no mota laran tanba fatin sira-ne’e la’ós lixeiru,” nia apela.
Tuir nia, komunidade soe lixu arbiru tanba seidauk iha konsiénsia hodi nafatin soe lixu arbiru iha fatin hein karreta no lixu hemu-han fatin mós sira soe arbiru, maibé ho konsiénsia populasaun sira-nian tenke hatoman-aan kaer ba soe iha lixu fatin.
“Ita atu halo sidade Dili livre husi lixu, ita ida-idak tenke iha konsiénsia atu soe lixu iha kaixote lixu nia laran no soe iha lixeira ne’ebé Governu prepara ona besik área imi hela ba ne’e,” nia dehan.
Notísia Relevante: AMD komemora Dili Day ba da-255 ho atividade feira-karavana kulturál
Jornalista : Jesuína Xavier
Editór : Cancio Ximenes
