DILI, 06 Marsu 2026 (TATOLI)—Ministru Interiór, Francisco da Costa Guterres, nomea ona Paulo Assis Belo lidera Komisaun Supervizaun ba rekrutamentu membru foun Polísia Nasionál Timor-Leste (PNTL) 2025.
“Nia (Paulo Assis) lidera prosesu diskusaun no prosesu administrativu sira de’it, mas nia laiha desizaun ruma iha ne’ebá, desizaun ne’e komisaun ne’e mak sei deside, nia simplesmente lidera de’it, nia modera diskusaun de’it,” Ministru Francisco hateten ba Jornalista sira hafoin ramata reuniaun Konsellu Ministru iha Ministériu Finansa, Aitarak-laran, Sesta ne’e.
Notísia relevante : Ekipa supervizaun ba rekrutamentu membru PNTL 2025 hahú halo serbisu
Governante ne’e fiar kapasidade Paulo Assis Belo bele lidera komisaun no sei halo serbisu ho di’ak.
“Nia nu’udar ema veteranu ida nusa mak la fiar, sim ha’u iha konfiansa absoluta ba nia, tanba nia nu’udar eis Vise-Ministru iha kapasidade veteranu ida, iha kapasidade di’ak sim, ita fiar,” nia akresenta.
Komisaun Supervizasun ba rekrutamentu membru foun PNTL ne’e foin halo serbisu iha loron 23 Fevereiru 2026 tanba sura husi komisaun ne’e nian enkontru dahuluk iha data hanesan.
“To’o agora sira seidauk relata buat ruma, tanba sira sei halo hela serbisu balun. Kuandu sira finaliza ona, entaun sei relata mai ha’u,” nia katak.
Jornalista : Natalino Costa
Editora : Julia Chatarina
