VIKEKE, 09 Marsu 2026 (TATOLI)—Ekipa husi Sekretaria Estadu Kooperativa (SEKoop), Segunda ne’e, oferese formasaun espesialidade kona-ba fiskalizasaun no auditória nian ba kooperativa primária no federeasaun sira iha Munisípiu Vikeke.
Iha formasaun ne’e, Koordenadór SEKoop Munisípiu Vikeke, Albino da Costa Guterres, haktuir objetivu husi formasaun ne’e atu hasa’e estrutura kooperativu no federeasaun sira-nia koñesimentu oinsá kontrola kooperativa.
“Husi formasaun ne’e bele ajuda sira atu kontrola atividade kooperativa idaidak nian hodi dezenvolve,” Albino ba TATOLI iha Postu Administrativu Vikeke Vila.
Tuir koordenadór ne’e katak formasaun ne’e fasilita tebes estrutura kooperativa tanda durante ne’e SEKoop seidauk oferese formasaun espesialidade ba federasaun no kooperativa primária sira.
Albino esplika formasaun oferese husi formadór ba área espesialidade nian hamutuk na’in-tolu (3) no formandu sira mai husi federasaun ida (1) no kooperativa primária hamutuk sanulu (10). Formasaun ne’e durante loron lima (5) ne’ebé hahú 09-14 Marsu.
Entretantu, formasaun ne’e partisipa husi estrutura federasaun hamutuk na’in-20 kompostu husi Kooperativa BFF na’in-tolu (3), Kooperativa Lahanas na’in-tolu (3), Kooperativa HAFA na’in- rua (2), Kooperativa ROHREK na’in-haat (4), C-PHF na’in-tolu (3), Kooperativa KAMENK na’in-rua (2), Kooperativa KUSU na’in-rua (2), Kooperativa OSGIMA na’in-rua (2) no Kooperativa KAHSUNG na’in-rua (2).
Jornalista: Vitorino Lopes da Costa
Editór: Xisto Freitas da Piedade
